Урал стильӧн из керӧтӧм
.jpg)
Урал стильӧн из керӧтӧм (рочӧн Уральская резьба по камню) — традиционнӧй роч отиркостся кипода удж, кӧда чужис Уралын XVII сёвоӧ да зорамӧ ӧнӧдз. Из серӧтӧмӧн-керӧтӧмӧн уджалӧны Урал пасьта, ӧддьӧн паськыта уджыс олӧ Шӧрӧт Уралын[1]. Сы центррезӧн лоӧны Екатеринбург, Нижний Тагил, Челябинск, Перем, Магнитогорск, Новоуральск, Кунгур, Берёзовский, Верхньӧй Пышма, Алапаевск, Верхньӧй Салда, Чусва, Лысьва, Асбест, Верхньӧй Уфалей, Заречный. Сідзжӧ из керӧтӧмӧн паськыта тӧдса Мурзинка посад. Сы киння, Уралын быд карын эм кӧть ӧтік киподаин, кытӧн уджалӧны из керӧтісь мастеррез[2].
История
Уралын из серӧтӧм-керӧтӧм аркмис XVIII сёвоӧ кыдз металл керӧтӧмкӧт ордчча кипод удж, чожа мыйись Урал пасьта уджалісӧ ни уна асторья киподаиннэз. Из керӧтіссез уджалісӧ гортся иззэзӧн (яшма, малахит, агат, кварц, сердолик, родонит, мрамор да мӧдіккез), кӧднӧ адззисӧ рудалӧн виль куйланіннэз кошшикӧ[3].
.jpg)
1726 воӧ Уралын вӧлісӧ осьтӧмӧсь из керӧтӧм сьӧрті медодзза мастерскӧйез. Императрица Екатерина І указ сьӧрті Уралӧ вӧлі командируйтӧм шведскӧй поручик Реф, медбы кошшыны рӧма иззэз да велӧтны из керӧтӧмӧ. 1765 воӧ Екатеринбургын оссис «Екатеринбургскӧй гранильнӧй фабрика» (ЕГФ), кӧдалӧн уджаліс филиал Чёрный Щит посадын (вӧлі пӧдналӧм 1868 воӧ)[4]. Фабрикаыс ӧтік кадӧ вӧлі из керӧтан шӧринӧн, рӧма из перйӧм да керӧтӧм сьӧрті промышленнӧй комплексӧн да профессиональнӧй училищеӧн. XVIII—XIX сёвоэзӧ фабрикаас кужисӧ нельки быдӧс из керӧтаннэз[4]. Сыын керисӧ дзебсян пӧввез, интерьернӧй вазаэз, пызан вевттэз, каминнэз, пирамидаэз да торшеррез, геммаэз («аттиккез»), а сідзжӧ поснит декоративнӧй пластика да дозмук: чаркаэз, шердыннэз, пурт ороппез, табакеркаэз, флакончиккез, настольнӧй ляканннэз, сава видзаннэз да мый да[3].
ХІХ сёво мӧд джыннас дзугсьӧны керӧмторрезлӧн композицияэз: лоӧ паськытжык рӧм палитра да быдкодьжыкӧсь мотиввез, мыйсянь ковсис унапӧлӧсажык сырьё. XIX—XX сёвоэз вежсьытӧн медыджыт из керӧтанінӧн лоис фирма «Фаберже». Эна воэзӧ пондісӧ керны объёмнӧй мозаика техникаын — изъя натюрморттэз, кӧднаӧн мичмӧтӧмӧсь пресс-папьеэз.
Рельефнӧй натюрмортӧн мозаика керӧмлӧн традицияэс кольччисӧ XX сёвоӧдз. XX сёвося керӧмторрес мыччалӧны авторлісь ассямасӧ. Композитсіяэз лоӧны лаконичнӧйжыкӧсь: мыччалӧны ӧтік вида быдмассэз. Мозаикаыслӧн эттшӧм синбаныс паськаліс Нижньӧй Тагилын, сідз, шуам, уджалісӧ В. М. Васильев мастерскӧйын[5].
Из керӧтӧмыс вились пондіс зорамны Уралын 1980-ӧт воэзӧ. Екатеринбургын аркмис чукӧр, кӧда профессиональнӧя уджаліс рӧма изӧн — Анатолий Жуков[6], Дмитрий Емельяненко, Александр Леверов. 1990-ӧт воэз помын аркмисӧ ыджыт киподаиннэз — Илья Боровиков нима Уральскӧй из керӧтан киподаин, Алексей Антоновлӧн Екатеринбургся из керӧтан киподаин. СССР разьсьӧм бӧрын оссис Россияын медодззаэзісь асторья из керӧтан фирма — «Яхонт и Ко»[7].
2000-ӧт воэз шӧрӧ Уралын аркмис тодиль из керӧтан школа[8]. Уральскӧй школакӧт ӧткоста зорамӧ Петербургскӧй из керӧтан искусстволӧн школа[9].
Ассяматоррез
XIX сёво кежӧ из керӧтӧмын аркмис Урал стиль, композицияэзын элементтэз керӧм сьӧрті пырся канон[10]. Шуам, корресӧ да вужжесӧ керлісӧ змеевикысь, златоустовскӧй яшмаись, офитісь, шочжыка — малахитісь. Быд тусьлӧ лӧсяліс аслас из: сьӧд сэтӧрлӧ — сьӧд агат, чочком сэтӧрлӧ — хрусталь, сьӧлаоз — малиновӧй шерл (турмалин), ӧмидзлӧ — селенит да орлец (родонит), бероз да озлӧ — сургучнӧй яшма, крыжовниклӧ — сердолик, мырпомлӧ — янтарь нето гӧрд коралл, виноградлӧ — аметист да мукӧдпырся кварц; ӧмидз, крыжовник да виноград керсисӧ быдса изись, бероз да оз — сідзжӧ, но быд тусьсӧ бура вундалӧмӧн; княженикалӧ — поснитик мастиккезісь, кӧдна ӧтлаасьӧмась шарӧн, чочком сэтӧр — кык джынъя гіглянокись, кӧдна вӧлісӧ лемӧтӧмӧсь.
XIX—XX сёво помын да ХХІ сёвоӧ медпаськытаӧсь лоисӧ П. П. Бажовлӧнуральскӧй сказзэзісь сюжеттэз. Нія сюжеттэз сьӧрті уджалӧны малахитӧн (унажыксӧ зарниӧтӧм бронзаӧн) да быдкодь рӧма иззэзӧн. Сюжеттэз коласісь медтӧдсаӧсь Меднӧй керӧслӧн кӧзяйка, Данила-мастер, да сідзжӧ Уралын паськыта тӧдса керӧссэз — Нижньӧй Тагилісь Лисья керӧс сьӧрті сюжеттэз, нето Кушваись Благодать керӧс сьӧрті, нето Курьи деревняись ротондаа изъяин да Шӧрӧт Ураллӧн мӧдік тӧдса керӧссэз да изъяиннэз сьӧрті. Ӧддьӧн паськыта тӧдсаӧсь малахитовӧй шкатулкаэз. 1970 воэзӧ сідзжӧ пондісӧ керны быдберся дозмук да бекӧрпань, кӧдна вачкисьӧны мини скульптураэз вылӧ. Шуам, мыр да сы гӧгӧр быдмана тшаккез да ошсьӧктаннэз синбана куритандоз[3].
Галерея
Малахитісь керӧм доззэз. 19 сёво. Эрмитаж, Санкт-Петербург
Грот-фонтан рӧма изісь. Екатеринбургскӧй гранильнӧй фабрика, 1785-1786 вз. Эрмитаж, Санкт-Петербург
Пресс-папье виноград туссезӧн. Екатеринбургскӧй гранильнӧй фабрика. Ферсман нима музей, Мурзинка
Камея «Юпитерлӧн юр диадемаӧн». Сердолик. Екатеринбургскӧй гранильнӧй фабрика, 1827-1828 вз. Эрмитаж, Санкт-Петербург
.jpg)
.jpg)
.jpg)
.jpg)
Пасйӧттэз
- ↑ Уральское камнерезное искусство. Культура Урала. Видзӧтӧм 21 Гожумпом 2025.
- ↑ Уральское камнерезное искусство. Уральское камнерезное искусство. Видзӧтӧм 21 Гожумпом 2025.
- ↑ 1 2 3 Хитунова Ю.Р. , Шишкина Ю.В. История развития камнерезного искусства на Урале. Уральское камнерезное искусство (2016-04-14). Видзӧтӧм 25 Гожумпом 2025.
- ↑ 1 2 Екатеринбургская гранильная фабрика. Уральское камнерезное искусство. Видзӧтӧм 21 Гожумпом 2025.
- ↑ Мастер камнерезного искусства В. М. Васильев. Уральское камнерезное искусство. Видзӧтӧм 21 Гожумпом 2025.
- ↑ Мастер камнерезного искусства А. И. Жуков. Видзӧтӧм 21 Гожумпом 2025.
- ↑ Камнерезные мастерские. Уральское камнерезное искусство. Видзӧтӧм 21 Гожумпом 2025.
- ↑ Уральская школа камнерезного искусства. Видзӧтӧм 21 Гожумпом 2025.
- ↑ Арцинович М. Петербургский стиль в камнерезном искусстве. СПб.: Артиндекс, 2013.. Видзӧтӧм 21 Гожумпом 2025.
- ↑ Промыслы по камню. Проект "Самобранка". Комсомольская правда. Видзӧтӧм 21 Гожумпом 2025.