Ульянов Александр Васильевич
| Ульянов Александр Васильевич | |
|---|---|
| Чужан лун | 1953 во одзар 9 лун |
| Чужанін | |
| Кулан лун | 2021 во арпом 23 лун (68 лет) |
| Канму | |
| Удж | гижись, журналист, главный редактор |
Ульянов Александр Васильевич (1953 во одзар 9 лун, Кулӧмдін, Коми Республика — 2021 во арпом 23 лун) — коми гижись, журналист.
Олантуй
Александр Ульянов чужис Коми АССР-са Кулӧмдін посадын 1953 во одзар 9 лунӧ. Помаліс Дереваннӧйын шӧрӧт школа, Коми канмуса педагогика институтісь филология факультетса коми юкӧн (1975), Ленинградса вылісь партийнӧй школа (1987).
Уджавлӧма «Красное знамя» газетаын корреспондентӧн, «Коми му» газетаын редакторӧн. Уна во сьӧрна вӧлі «Войвыв кодзув» журналын шӧр редакторӧс вежлісьӧн.
1994 восянь Коми небӧг лэдзанінын директор. 1999 восянь уджаліс «Эскӧм» небӧг лэдзанінын. 2004—2011 воэзӧ юраліс «Коми му» газет редакцияӧн, кытчӧ ӧтувтісны коми кывъя нёль газет-журнал.
Куліс 2021 во арпом 23 лунӧ.
Гижан удж
Медводдза кывбуръяссӧ йӧзӧдӧма Кулӧмдiн районса «Парма гор» газетын. Сёрӧнджык кутӧма гижны проза. Висьтъясас да очеркъясас восьтӧ коми сикт вӧсна ассьыс дойсӧ, мӧвпалӧ сылӧн аскиалун йылысь. Гижӧдъяссӧ «Сельская жизнь» газет пасйӧма «Медбур очерк» нимпасын мӧд премияӧн.
1992-ӧд воын вуджӧдӧма «Челядьлы Библия» да йӧзӧдӧма «Коми му» газетын. 1994-ӧд воын Александр Ульянов пырӧма Россияса гижысь котырӧ.
Александр Ульянов унаысь вермылӧма «Эзысь борд» республикаса литературнӧй конкурсын, кодӧс вӧлі лӧсьӧдӧма Коми Республикаса каналан сӧвет да «Войвыв кодзув» журнал: «Публицистика» нимпасын вермӧма 2013-ӧд воын.[1]
Мукӧдтор
Куимысь сійӧс бӧрйылісны веськӧдлыны Коми Республикаса журналист котырӧн.
Небӧгъяс
Комиӧн
- Ульянов А. В. Сьӧд ар: эссе, висьтъяс, повесьт. — Сыктывкар: Коми книжнӧй издательство, 1992. — 160 л.б.
- Ульянов А. В. Изъя чой: висьтъяс. — Сыктывкар: Коми небӧг лэдзанін, 2001. — 128 л.б.
- Ульянов А. В. Выль керка: висьтъяс. — Сыктывкар: «Эскӧм», 2003. — 212 л.б.
- Ульянов А. В. Олӧмыслӧн пыдӧсыс оз тыдав: повесьтъяс, висьтъяс, публицистика юкӧн. — Сыктывкар: «Эскӧм» небӧг лэдзанін, 2013. — 488 л.б.
- Ульянов А. В. Сырчик поз / Ред. А. В. Попов. — Сыктывкар: «Эскӧм» небӧг лэдзанін, 2022.
Рочӧн
- Ульянов А. В. Деревенька моя. — Сыктывкар.
- Ульянов А. В. Глубинка. — Йошкар-Ола, 2011.
Мари кывйӧн
- Ульянов А. В. Тора ял / Вуджӧдіс Евгений Садовин. — Йошкар-Ола, 2015. — 488 л.б.[2]
Ошканпасъяс
- Коми Республикаса Веськӧдлан Котырлысь премия босьтысь «журналистика» юкӧнын (2008)
- Коми Республикаса Веськӧдлан Котырлысь И. А. Куратов нима премия босьтысь литература юкӧнын
- «Эзысь борд» премия унаысь босьтысь: «публицистика» юкӧнын (2013)
- Коми Республикаса нимӧдана уджалысь
- «Признание» творческӧй конкурслӧн «Золотое перо» нимпасын вермысь
- «Коми Республикалы 100 во» медаль (2021)
- Россияса журналист котырлӧн «Заслугаясысь» почёт пас