Социальнӧй архитектор
| Социальнӧй архитектор | |
|---|---|
 | |
| Иналӧм | Канмуӧн да муниципалитетӧн юралӧм |
| Аркмӧтан кад | 2020-ӧт воэз |
Социальнӧй архитектор (рочӧн Социальный архитектор) — специалист, кӧда проектируйтӧ да реализуйтӧ социальнӧй практикаэз да инициативаэз, кӧдна веськӧвтӧмӧсь ӧння общественнӧй моггез арталӧм вылӧ. Социальнӧй архитектура контекстын сія лоӧ йитӧтӧн унапӧлӧс социальнӧй группаэз, институттэз да канму структураэз коласын.
2025 во одзар 1 лунсянь МГУ-ын да Финансовӧй университетын медодззаэзӧн Россияын осьтісӧ социальнӧй архитектура сьӧрті магистр программаэз[1].
Тодиль удж
«Социальнӧй архитектор» вежӧртӧтыс аркмис 2020-ӧт воэзӧ. Терминыс мыччалӧ мортпӧлӧсӧс зорӧтӧм ӧння кадӧ, кӧр могӧн лоис гражданскӧй общество лӧсьӧтӧм проекттэз пыр, кӧдна ӧтлаӧтӧны канму, бизнес да гражданаӧс.
2025 во гожумпомӧ социологгес шуисӧ «социальнӧй архитектор» одзланься профессияӧн. Социальнӧй туялӧмын эксперттэзкӧт ӧтуджалӧм сьӧрті Экспертнӧй институтлӧн юралісь директор Фирдус Алиев висьталӧм сьӧрті, социальнӧй архитектураыс — уна тшупӧда конструкция[2]:
Социальнӧй архитекторлӧн миссия — отсавны зорӧтны да паськӧтны Россияын социальнӧй прогнозируйтан да социальнӧй проектируйтан технологияэз, культура да практика торья специалисттэзлӧн да быдса организацияэзлӧн кооперацияын быдӧс компетенцияэз, экспертиза, юӧр ресурссэз ӧтлаӧтӧм пыр. Миян мог матісь кадӧ — лӧсьӧтны ашынся кад йылісь синбан лӧсьӧтан да сійӧ корректируйтан процесс, кӧда пондас реализуйтсьыны быдкодь тшупӧда социальнӧй проекттэз отсӧтӧн.
Социальнӧй архитекторрез вермасӧ уджавны региональнӧй администрацияэзын, кыдз субъект юралісьӧс вежліссез. Видзчиссьӧ, мый ны кипод увтӧ пырасӧ демографическӧй политика, семьялісь доннэз видзӧм да этноскостся йитӧттэз. ВЦИОМ-лӧн юралісь Валерий Фёдоров висьталіс, мый виль специальностьсӧ каналан вертикальӧ интегрируйтӧм понда аркмӧм ни лӧсялана «пейзаж»[3]:
Социальнӧй архитектураыс сулалӧ визир вылын, одзжык сы понда используйтісӧ кыв «междисциплинарность», ӧні унажыксӧ баитӧны интеграция йылісь.
Планируйтсьӧ, мый виль специальность пыртӧмӧн вуззэз пондасӧ тӧдчӧтны ассяма компетенцияэз. Сідз, МГУ пондас видзӧтны политологическӧй аспекттэз вылӧ, ВШЭ — медиакоммуникацияэз вылӧ, РАНХиГС — канму веськӧтлӧм вылӧ.
Велӧтӧм
2025 вося одзар 1 лунсянь Россияын медодззаись осьтісӧ социальнӧй архитектура сьӧрті магистрскӧй программаэз: МГУ-ись политология факультетын да РФ правительство дынся Финансовӧй университетлӧн социальнӧй наукаэз да масс-коммуникацияэз факультетын. Сідзжӧ содтӧт велӧтчан курссэз вӧлісӧ осьтӧмӧсь РГГУ-ын.
Велӧтчан планӧ пырӧны политическӧй стратегияэз, информационно-аналитическӧй ӧтсӧт, социальнӧй архитектураын моделируйтӧм да проектируйтӧм, а сідзжӧ гражданскӧй астӧдӧм лӧсьӧтӧм йылісь дисциплинаэз. Магистранттэз пондасӧ велӧтны кыдз теория, сідз и практика, политология, социология, коммуникация да общественнӧй проекттэзӧн юралӧм сьӧрті.
МГУ-ись политология факультетлӧн декан Андрей Шутов шуӧмӧн магистррез лоасӧ колана специалисттэзӧн, кӧдна вермасӧ уджавны общество, власть да бизнес йитӧтын, участвуйтны общественнӧй тӧдчӧта проекттэз аркмӧтӧмын да лӧсьӧтны коммуникация быдкодь социальнӧй группаэз коласын[4].
Социальнӧй процессэз, мониторинг да анализ юалӧммез сьӧрті РФ президентлӧн управленнёись начальник Александр Харичев висьталіс, мый ӧння кадӧ колӧны специалисттэз, кӧдна кужӧны ӧтлаӧтны тӧдӧмсӧ практикаӧн да чожа реагируйтны виль вызоввез вылӧ[5].
Социальнӧй архитектура регионнэзын
Пермскӧй крайын 2025 во тулыспомсянь чулӧтсьӧ «Тӧд мияніссесӧ» (рочӧн Знай наших) проект. Сы сьӧрті висьтассьӧ Пермскӧй крайын чужӧм да уджалӧм гора нима отир йылісь[6].
Кировлӧн 650 вося юбилей кежӧ, кӧдӧ порйӧтісӧ 2024 воӧ, вӧлі лӧсьӧтӧм метафора, мый регионлӧн юркарыс — «Роч Ойвывлӧн пыранін». Сэксянь туристическӧй проекттэз да архитектурнӧй решеннёэз йитсьӧны эта темаӧн.
Саха Республикалӧн губернатор Айсен Николаев висьтасис саха кино дынӧ содан интерес йылісь. Сылӧн шуӧмӧн республикаыс лоис мӧдӧдззаӧн Россияын керӧм фильммез сьӧрті Москва бӧрын.
Мурманск областьын пондӧтісӧ «Ойвылын овны» (рочӧн На Севере жить) акция. Отир бура примитісӧ сэтшӧм лозунг, сыбӧрын регион зорӧтӧм йылісь плансӧ шуисӧ сідз жӧ[7][8].
Пасйӧттэз
- ↑ Елизавета Шишкова. В России впервые стартовали магистерские программы по социальной архитектуре, Взгляд.ру (1 Одзар 2025). Дата обращения: 26 Одзар 2025.
- ↑ Иван Латун. Социологи назвали социального архитектора профессией будущего - Российская газета, Российская газета (8 Гожумпом 2025). Дата обращения: 26 Одзар 2025.
- ↑ Григорий Лейба. Экспертиза по любым вопросам, Коммерсантъ (8 Гожумпом 2025). Дата обращения: 26 Одзар 2025.
- ↑ Елизавета Шишкова. В России впервые стартовали магистерские программы по социальной архитектуре, Взгляд.ру (1 Одзар 2025). Дата обращения: 5 Одзар 2025.
- ↑ Анастасия Лютикова. В российских вузах впервые начали готовить социальных архитекторов, Ура.ру (1 Одзар 2025). Дата обращения: 26 Одзар 2025.
- ↑ Дарья Алиева О социальной архитектуре в Пермском крае рус.. Российская ассоциация политических консультантов. Видзӧтӧм 26 Одзар 2025.
- ↑ Елена Мухаметшина. В университетах начнут учить на социальных архитекторов, Ведомости (19 Одзгожум 2025). Дата обращения: 26 Одзар 2025.
- ↑ Стратегический план «На Севере - жить!» рус.. Наш Север. Видзӧтӧм 26 Одзар 2025.