Россия лун
| Россия лун | |
|---|---|
 | |
| Тип | Нация лун |
| Официальнӧя | Россия лун |
| Мӧдінёж | 2002 во тӧвпом 1 лунӧдз — «Российскӧй Федерация канму суверенитет йылісь декларация бурсьӧтӧм лун» |
| Вежӧртас | РСФСР канму суверенитет йылісь декларация |
| Аркмӧтӧм |
1992 во одзгожум 11 лун (Российскӧй Федерация Медвылісь совет «Одзгожум 12 лунся донтан лун йылісь» № 2981-I постановленнёӧн) |
| Чулӧтӧны |
 Российскӧй Федерация |
| Лун | одзгожум 12 лун |
| Чулӧтӧм | концерттэз, патриотика акцияэз, фейерверккез |
| Традицияэз | Госпремияэзӧн да донтан пассэзӧн ошкӧм Кремльын |
 Медиафайлы на РУВИКИ.Медиа | |
Россия лун (рочӧн День России, одзза нимыс рочӧн — День принятия Декларации о государственном суверенитете, мӧдік одзза нимыс рочӧн — День Независимости) — Российскӧй Федерацияын канму статуса донтан лун, кӧда сиӧм Россия канму суверенитет юӧртӧмлӧ. Чулӧтсьӧ быд во одзгожум 12 лунӧ. Аркмӧтӧм 1992 во одзгожум 11 лунся РФ Медвылісь Совет решеннёӧн[1] сиӧмӧн РСФСР канму суверенитет йылісь Декларация бурсьтӧмлӧ[2]. Одзгожум 12 лун абу уджалан лун. Петӧ ко субӧтӧ нето кресенняӧ, шоччисян луныс вуджӧтсьӧ одзланься уджалан лунӧ.
История
1990 во одзгожум 12 лунӧ РСФСР народнӧй депутаттэзлӧн I съезд коста вӧлі бурсьӧтӧм РСФСР канму суверенитет йылісь Декларация, кӧда пуктіс подув одзланься реформаэзэлӧ да лоис одзланься оськӧлӧн, кӧда сибӧтіс СССР-лісь разьсьӧм[3]. Декларацияыс юӧртсис кадӧ, кӧда пырис историяӧ «суверенитеттэзлӧн парад» нимӧн, кӧр республикаэз сьӧрсьӧн-бӧрсьӧн петісӧ Союз составсис. Сы сьӧрті президент Борис Ельцин и бӧрйис донтан лунлӧ медодзза ним — Независимость лун[4]. 1993 во одзгожумӧ Россия граждана дынӧ юӧртчӧмӧн канму юралісь висьталіс:
Россия панталӧ ассис канму донтан лун Независимость лун. Эта донтан луныс том, сія пырис миян оланӧ куим во одзті, кӧр вӧлі бурсьӧтӧм Россия канму суверенитет йылісь декларация[5].
1994 воӧ Борис Ельцин аслас указӧн пуктіс одзгожум 12 лунсӧ РСФСР канму суверенитет йылісь Декларация бурсьӧтан лунӧн. «Россия лун» нимыс вӧлі пуктӧм 2002 воӧ[6].
Вежӧртассэз да контекст
Донтан луныслӧн вежӧртӧмыс вежсьывліс историческӧй контекст сьӧрті. Медодз одзгожум 12 луныс вӧлі йитӧм суверенитет йылісь Декларациякӧт, кӧдаын вӧлі пыртӧм РСФСР-лӧ «СССР-ись свободнӧя петӧм вылӧ позьӧс», датаыс ӧддьӧнжыксӧ символизируйтіс историческӧй йитӧттэз орӧтӧм, канму зорӧтӧмын дыр кадкостісь кидтчӧм[7].
1991 вося лоӧмторрез кыдз «XX сёвося медыджыт геополитическӧй катастрофа» вежӧртӧмӧн вежсис и донтан лунлӧн вежӧртасыс, сы могӧ пуктӧм не одззася оланісь кидтчӧм, а сы паныт — одзза проблемаэзісь туй адззӧм да перспективаэз арталӧм[8]. Кыдз тодиляліс 2001 во одзгожум 12 лунӧ Россия лунся торжественнӧй приём вылын аслас сёрниын Владимир Путин:
Быдӧс, мый олӧм-вӧлӧм эна воэзӧ, быдӧс миян опытным — и вермӧммез, и дзугсьӧммез — висьталӧ ӧтік йылісь. Быдкодь реформаэз артмӧны сэк, кӧр нія пыртӧмӧсь отир понда. Абу ко граждана понда, нія озӧ петӧ. Этаын и эм российскӧй демократиялӧн медшӧр урок. Сы йылісь миянлӧ колӧ баитны и талун, Россия лунӧ[9].
Российскӧй Федерация гӧгӧр геополитика дзескӧтӧм кузя, медодз санкцияэз пыртӧм, а сыбӧрын и гибриднӧй война лэбтӧм кузя, Россия лунлӧн семантикаыс вежсис, сія мыччалӧ лун, кӧда символизируйтӧ суверенитет бергӧтӧм, экономическӧй вын бергӧтӧм да канму дорьянвын ёнмӧтӧм. Эта петӧ и социологическӧй юасьӧм сьӧрті, ВЦИОМ-ӧн 2022 воӧ чулӧтӧм исследованнё сьӧрті, 58 % жалейтісӧ, мый СССР-ыс разьсис[10].
Традицияэз да символлэз
Россия лунӧ Кремльын традиционнӧя чулӧтсьӧ наука да технология, культура да искусство юкӧнын РФ канмуся премияэз, да сідзжӧ «Российскӧй Федерациялӧн Уджын Герой» донтан пассэз сетан церемония. Донтан лунлӧн символӧн лоӧ Россиялӧн дӧрапас, медшӧр порйӧтанінӧн — Краснӧй площадь. Канму пасьта улицаэсӧ мичӧтӧны флажоккезӧн да плакаттэзӧн. Чулалӧны фестиваллез, концерттэз, выставкаэз, спорт мероприятиеэз да патриотическӧй акцияэз. Сідз, 2024 воӧ Краснодар крайись Сукко посадмуын Россия лун кежӧ паськӧтісӧ 4 сюрс м²-ся ыджытжык Россия дӧрапас. Ыджыт дӧрапас Сьӧд саридз дорын видзисӧ 1221 морт. Россия рекорддэза небӧглӧн эксперттэз пасйисӧ этӧ фактсӧ[11].
Одзгожум 12 лун — гӧтрасьӧм понда популярнӧй лун. Сідз, 2024 воӧ Россия лунӧ Москваын гӧтрасисӧ 165 гозъя[12]. Юркарын эта лунӧ оссьӧны содтӧт местаэз, кытӧн позьӧ регистрируйтны гӧтрасьӧм, ны лыдын лӧсьӧтӧны выезднӧй площадкаэз: ювывся трамвайез вылын, метрополитен станцияэзын, карись историческӧй особняккезын да усадьбаэзын.
Канму пасьта чулӧтсьӧны донтан лунся концерттэз, спортивнӧй да патриотическӧй акцияэз; керсьӧны салюттэз. Одзгожум 12 лун лоӧ шоччисян лунӧн, петӧ ко сія субӧт нето кресенняӧ, шоччисян луныс вуджӧтсьӧ одзланься уджалан лун кежӧ[13].
Нижегородскӧй кремль весьтын Россия лунлӧ сиӧм донтанлунся салют. Нижньӧй Новгород, 2015 во одзгожум 12 лун.
«Маяковскӧй» метро станцияын гӧтрасьӧм том гозъя (2022 во одзгожум 12 лун).
Санкт-Петербург. Петровскӧй фарватер районын Россия лунӧ Россия дӧрапас лэбтӧм сьӧрті акция коста. Флайбордисттэс лэбисӧ 12 метра вылынаӧ.
Российскӧй Федерациялӧн медыджыт дӧрапас, кӧдӧ паськӧтісӧ Анапаын Россия лунӧ. 2024 во одзгожум 12 лун.
Пасйӧттэз
- ↑ История празднования Дня России - ТАСС, TACC. Дата обращения: 27 Тулысшӧр 2024.
- ↑ Указ Президента РФ О государственном празднике Российской Федерации (02.06.1994).
- ↑ День России 12 июня: как отмечают, история праздника, РБК Life. Дата обращения: 27 Тулысшӧр 2024.
- ↑ День принятия Декларации о государственном суверенитете России - День России.
- ↑ Обращение Президента Российской Федерации Б.Н.Ельцина к гражданам Российской Федерации накануне праздника - Дня независимости России.
- ↑ День России в 2024 году: история и традиции праздника (2 мая 2023).
- ↑ Декларация о государственном суверенитете Российской Советской Федеративной Социалистической Республики.
- ↑ Путин разъяснил свои слова о "геополитической катастрофе" в контексте распада СССР - ТАСС, TACC. Дата обращения: 30 Тулысшӧр 2024.
- ↑ Выступление на торжественном приеме по случаю Дня принятия Декларации о государственном суверенитете России (12.06.2001).
- ↑ Ровно тридцать лет и три года, Коммерсантъ (11 Одзгожум 2023). Дата обращения: 2 Тулыспом 2024.
- ↑ На Кубани в День России развернули самый большой триколор страны, TACC. Дата обращения: 4 Одзгожум 2025.
- ↑ 165 пар поженились в Москве в День России // Новости НТВ, НТВ. Дата обращения: 4 Одзгожум 2025.
- ↑ Праздник и выходные в июне 2025 года: как работаем и отдыхаем \ КонсультантПлюс рус..