Немтинова Галина Ильинична
| Немтинова Галина Ильинична | |
|---|---|
| Чужан лун: | 1934 во тӧвпом 2 лун (91 год) |
| Чужанін: | |
| Удж | велӧтісь |
Немтинова Галина Ильинична — коми кыв туялісь, коми-пермяцкӧй кыв сьӧрті методист, школаэз понда велӧтчан небӧггез лӧсьӧтісь.
Олантуй
Чужис 1934 во тӧвпом 2 лунö Кудымкар районiсь Ёгвинскöй сельсоветiсь Рунцова деревняын колхозниккез семьяын. 1949 воö помалiс сизимкласса школа да пырис велӧтчыны Кудымкарскöй педагогическöй училищеӧ, кӧдӧ помаліс 1953 воӧ.
Педучилище помалöм бöрын Галина Ильинична кык год уджалiс начальнöй классэзiсь велöтiсьöн Гайнскöй районiсь Чажеговскöй сизимкласса школаын. 1955-1960 воэзö велöтчис Пермскöй государственнöй педагогическöй институтын, коми-пермяцкöй группаын. Институт помалöм бöрын Галина Немтиноваöс ыстiсö уджавны Кудымкарскöй педучилищеö, кытöн сiя уджалiс роч да коми-пермяцкöй кыввез сьöртi велöтiсьöн 30 во сьöрна.
Галина Ильинична веськӧтліс училищеись студенттэз педагогическöй практикаöн, вит год сьöрна юраліс училищелöн заочнöй отделеннёöн.
Училищеын уджалікӧ Галина Ильинична нуӧтіс ыджыт общественнӧй удж: вӧлі коми-пермяцкӧй кыв, литература да культура радейтіссезлӧн "Югӧр" котырын секретарӧн, училищеын ветераннэзлӧн котырын юралісьӧн.
Г.И.Немтиновалӧн велӧтан стажыс 38 во.
Методическӧй удж
Галина Ильинична Немтиновна чулöтiс ыджыт методическӧй удж коми-пермяцкöй кыв сьöртi начальнöй классэз понда программаэз, учебниккез да методическöй пособиеэз гижикӧ да аркмӧтікӧ. Öтлаын мöдiк велöтiссезкöт Г.И.Немтинова лöсьöтiс 27 быдкодь изданнё. Сідз, Галина Ильинична лоӧ школьнӧй вуджӧтан кывчукӧрлӧн, серпаса азбукалӧн да «Тӧд жӧ, тӧд» сборниклӧн авторӧн.
Ошканпассэз
- "Отличник народного просвещения" пас
- "Ветеран труда" медаль