Мыр шедтан (орсан)
Мыр шедтан ― коми отирлӧн традиционнӧй вермасьӧм, вачкисьӧ мас-рестлинг спорт вылӧ. Вермасьӧны челядь да ыджыттэз, иньпӧлӧс да айпӧлӧс.
Вермасьӧм
Традиционнӧй вермасьӧмын атрибутыс ― быгрӧтчан. Ачыс вермасьӧмыс ― кык морт пуксьӧны ӧтамӧдлӧ паныт да ӧтлаӧтӧны кок пыдӧссэзнысӧ. Ӧтыс кутӧ быгрӧтчансӧ доррезӧттяс, мӧдыс ― шӧрӧттяс. Ӧтшуӧм бӧрын кыкнанныс пондӧны кыскыны быгрӧтчансӧ асланяныс. Вермӧ сія, кин кыскас быгрӧтчансӧ ас дорас. [1]
Традицияын
Мыр шедтаннас орслывслісӧ челядь и ыджыттэз, иньпӧлӧс да айпӧлӧс. Вермасьлісӧ керкын и ӧтӧрын кузь во сьӧрна, унажыксӧ тӧвся вежалуннэз коста, Светтё дырна, да гожумӧн, Стрӧча коста.
Ӧння кадӧ
Ӧння кадӧ «Мыр шедтаныс» пырӧ «Дзулимпиадаӧ»[2][3]. Мед опастыны вермасьӧмсӧ, быгрӧтчаныс туйӧ босьтӧны кузькодь волькыт бедь да кок пыдӧссэз коласӧ пуктӧны пӧв.
Мӧдіклаын
«Мыр шедтаныс» кодь традционнӧй вермасьӧмыс эм мирын уналаын. Аляска йӧззэзлӧн сія шусьӧ Eskimо Stick Pull[4], норвеггезлӧн ― Kjevletrekk[5] , финнэзлӧн ― Kartunveto нето Väkikapulan veto[6].
Якутия инициатива[7] сьӧрті «мыр шедтаныс» кодь вермасьӧмыс пӧртӧм официальнӧй спорт дисциплинаӧ «мас-рестлинг» (якут. мас тардыhыы, англ. mas-wrestling) нимӧн. «Мас» кылыс саха кывйын лоӧ «пу, бедь», «рестлинг» кылыс босьтӧм английскӧй кылісь, сылӧн вежӧртасыс «вермасьӧм». Россияын да мирын осьтӧмӧсь да уджалӧны мас-рестлинг сьӧрті спорт федерацияэз[8][9], чулӧтсьӧны чемпионаттэз.
Пасйӧттэз
- ↑ Сиг, падей да горань: коми-пермяккезлöн орсаннэз (Сиг, падей и горань: игры коми-пермяков) / Авторы-составители: Н. А. Мальцева, Т. Н. Меркушева, Н. А. Пушкина. ‒ Кудымкар: ПРОО «Общество радетелей коми-пермяцкого языка и культуры «Югöр», 2021. ‒ 118 с. ‒ С. 83.
- ↑ Михаил Вотинов. В Архангельском прошла «Дзулимпиада». 04.07.2021. Парма-Новости
- ↑ Спортивный турнир «Дзулимпиада». Культура РФ
- ↑ Eskimo Stick Pull. Wernative.org
- ↑ Kamp i «kjevletrekk». Аgderposten
- ↑ Väkikapulan vetoa. Кoskenkohinat.fi Видзӧтан кад: 20.11.2024.
- ↑ История мас-рестлинга // Международная федерация мас-рестлинга
- ↑ Всероссийская федерация мас-рестлинга
- ↑ International mas-wrestling federation