Масленича
Б. Н. Ельцин нима библиотекалӧн материаллэз
Б. Н. Ельцин нима Президентскӧй библиотека фонддэзісь материаллэзӧн
| Масленича | |
|---|---|
 | |
| Тип | Отиркостся-христиана |
| Мӧдінёж | Масленича недель |
| Сідзжӧ | Рися недель (вичкуся) |
| Вежӧртас | тӧв кольлалӧм |
| Чулӧтӧны | асыввывся славяна |
| Кытшӧм кадсянь | Яйтӧм недель бӧрся вильлунсянь |
| Кытшӧм кадӧдз | Прощёнӧй кресення |
| Лун | кыкьямысӧт недель Ыджыт лун одзын |
| Чулӧтӧм | отиркостся порйӧтӧм |
| Традицияэз | пӧжавны блиннэз, сырниккез, керны варениккез, ветлыны гӧститны, ӧктыны пызан, ысласьны додьӧн да дадьӧн, маскаравны, сотны нето дзебны Масленича акань |
| Йитӧм | Ыджыт видзӧн |
 Медиафайлы на РУВИКИ.Медиа | |
Масленича (рочӧн Масленица) — асыввывся славяналӧн тулысся отиркостся вежалун. Порйӧтсьӧ Ыджыт видз одзын медбӧрья недель сьӧрна, вичку календарь сьӧрті — Йӧла недель. Лӧсялӧ Госа вторникӧн да карнавалӧн, кӧднӧ порӧтӧны традиционнӧй католическӧй да протестантскӧй канмуэзын. Масленича чулӧтӧмын эмӧсь мымдакӧ важся, христиана одзся элемент[1].
Масленича лун вежсьӧ быд во Ыджыт лун сьӧрті. 2026 воӧ Масленича недельыс пондӧтчӧ тӧвпом 16 лунӧ да помассьӧ 22 лунӧ.
Традиционнӧй сёян роччезлӧн — блиннэз да лепёшкаэз, да белоруссэзлӧн да украинеццезлӧн — варениккез да сырниккез[2]. Украинскӧй да белорусскӧй отиркостся культураын эм сідзжӧ гӧтрасьтӧг олӧм кузя мыжьян орсан — колодка (каб)[3].
Ӧння кадӧ Масленича порйӧтан атрибуттэзӧн лыддьӧны гуляйтӧм да ыджыт акань сотӧм[2].
Семантика
Масленича роч традиционнӧй культураын маркируйтӧ виль мувӧдитан во пондӧтчӧм. Эта кадӧ олӧмыс йитӧм кык ӧтамӧдкӧт йитчӧм темаэзӧн: тырдозӧн (аграрнӧй, оргиастическӧй, фертильнӧй, матримониальнӧй темаэз) да важжезӧс вошшӧтӧмӧн да пӧрисьпӧлӧс донтӧмӧн[1][4].
Сідз кыдз Масленичаыс ӧтлаасьӧ православнӧй вичку календарись Йӧла недельӧн, Масленича гажсӧ сідзжӧ вежӧртӧны кыдз Ыджыт видз одзланься кӧс видзӧм[1][4].
Порйӧтан недельлӧн динамикаыс содіс помланьӧ. Медодзза луннэзӧ лӧсьӧтчисӧ орсан да гажӧтчӧммез кежӧ, кӧдна пондӧтчисӧ четвергсянь, кӧр сибаліс сідз шуана «Паськыт Масленича»[2].
Масленицалӧн медшӧр темаӧн, Владимир Пропп шуӧмӧн, лоӧ мулӧн чужтӧм, кӧда архаическӧй отир мылын топыта йитӧм важжезӧс касьтылӧмӧн, ритуальнӧй сёйӧмӧн, морт чужтӧмӧн да гӧтрасьӧмӧн[4]. Масленича чулӧтӧмыс ӧтлаӧтӧ этнӧ мотиввесӧ. XXI сёво пондӧтчикӧ унажыкыс этшшӧм порйӧтӧмсис кольччис кыдз рудимент да вежалуныс лоис туйӧн тӧдсасьны отиркостся культуралӧн торья элементтэзӧн. Быдлунся оланын кольччис гӧститны ветлӧм да блиннэз сёйӧм, да сідзжӧ мылыштны корӧм Прощёнӧй кресенняӧ[2].
Ӧння кадся фольклорист А. Б. Мороз шуӧмӧн, оз позь висьтавны, мый Масленичаыс — языческӧй вежалун. Масленича чулӧтӧмыс вились вежӧртӧ сійӧ, мый вӧзйӧ вичку. Торйӧнжык кӧ, кӧс видзыс вежӧртсьӧ традиционнӧй культураӧн кыдз сёянісь видзсьӧм, сідзкӧ, видзыс пондӧтчӧм одзын колӧ сёйны кыдз позьӧ унажык. Медшӧр ассяматорыс, кӧдаын адззӧны Масленичалісь «языческӧй» визьсӧ — ыджыт акань керӧм да сотӧм. Но эта аканьыс некӧр эз лыддиссьы идолӧн, да сы керӧмын да сотӧмын эмӧсь орсан вужжез[5].
Чулӧтӧм
Касьтісян практикаэз
Масленичалӧн мукӧд ритуалын эм касьтісян характер. Кулӧммезӧс тулысся касьтылӧм, кӧдӧ вичку календарын чулӧтӧны куим субӧтӧн (яйтӧм да кык кӧс), отиркостся календарьын мыччалӧм ӧзтыны бипуррез, сёйны блиннэз, ветлыны шойнаӧ касьтісьны, ветлыны маскаравны Масленича аканьӧн, пасьтасьны маскарӧ да дзебны аканьсӧ[1].
Блиннэз да мӧдік сёян
Важын отирыс чайтісӧ, мый кулӧммес, кӧр нія куйлӧны му пытшкын, вермӧны отсавны мулӧ чужтыны. Блиннэз вӧлісӧ касьтісян сёянӧн, нійӧ вайлісӧ шойнаӧ нето кольлісӧ кулӧммес ӧшын вылӧ, медбы корны нылісь отсӧт мувӧдитӧмын. Мельниккесӧ сетлісӧ корыттэзлӧ либо сёйлісӧ кулӧммезнысӧ касьтісян могись. Масленича медбӧрья лунӧ — Прощённӧй кресенняӧ — ветлӧмась «кольласьны» шойнаӧ[4].
Блиннэз лоӧны медархаичнӧй сёянӧн, кӧдӧ кокнит лӧсьӧтӧны, кокнит новйӧтӧны местаись местаӧ да нія тырмӧмви пӧтӧсаӧсь. Этна куим фактор керӧны блиннэсӧ вежалунлӧн медшӧр гастрономическӧй элементӧн[4]. Вичку календарь сьӧрті оӧ позь сёйны яй Йӧла недель коста, мый мыччассьӧ, мыля порйӧтан пызан вылын абу яя сёян. Позьӧ сёйны чери, кольть да йӧла продукттэз[1].
Масленичаӧ ӧтлаӧтчӧм, кӧда Пропп сьӧрті сідзжӧ йитӧм му чужтан вынкӧт, вермас лоны кольччӧмӧн Виль во порйӧтӧмсянь, кӧдӧ чулӧтлісӧ одзтулысӧ 1348 воӧдз. Вильвося сёян тулыснас вежалунсӧ вуджӧтікас эз ӧш. Гӧститӧмыс вӧлі сідзжӧ ловья родня гӧститӧтан элементӧн. Ӧтласа сёйӧм ёнмӧтіс социальнӧй йитӧттэз да отсаліс интегрируйтчыны томгозъяэзлӧ[4]. Уна сёйӧм да юӧм сідзжӧ отсалісӧ бырӧтны берся волыда айморт да иньморттэзлӧ ӧтамӧдколасся этика барьеррез, мый петіс кыдз продуктивнӧй пон активизируйтӧм[4].
Томгозъяэзӧс донтӧм
Масленичаыслӧн эм ыджыт тӧдчӧт роч гӧтрасянын да сія лоӧ во сьӧрнася гӧтрасян цикллӧн помӧн. Томгозъя обряддэс керсисӧ и мӧдік луннэзӧ (Ыджыт лунӧ, Иванлунӧ да Петырлунӧ). Альберт Байбурин шуӧмӧн, этна практикаэзлӧн ӧтласа вежӧртӧтыс лоӧ томгозъялісь аркмӧм статус вежсьӧм социальнӧя, да сідзжӧ гортся общиналӧн календарнӧй да социальнӧй ритмӧ индивидуальнӧй гӧтрасьӧм пыртӧмын[6].
Лӧсялана чулӧтан практикаэзӧн позьӧ лыддьыны ойвывся роччезлісь вьюнишник (петан сьыланкыввез томгозъяӧс вежалуналӧмӧн), целовник (томгозъялӧн гортаныс вовлӧм, кӧда коста том иньсӧ гӧститӧтӧны да окасьӧны гӧссез), том айкаэзлӧн керӧссэз вывсянь ысласьӧм, да тӧдсажык тёща блиннэз — томгозъялӧн иньлӧн аймам керкуӧ вовлӧм. Вовлісӧ сідзжӧ вежайез дынӧ да быдӧс родня дынӧ. Сэк жӧ пӧрисьжык роднӧйез дынӧ ветлӧмсӧ позьӧ сідзжӧ йитны Маслянича костася пӧриссезӧс донтӧмӧн[6][3][1].
Масленича чулӧтӧмись ритуальнӧй сценарийсис кидсьӧмыс символическӧя мыжйиссьӧ. Сія мыччиссьӧ украинскӧй да белорусскӧй вешание колодок (каббез ӧшӧтӧм) зонкаэзлӧ да нывкаэзлӧ сы кузя, мый нія эзӧ гӧтрасьӧ кольӧм воӧ[6].
Маскаралӧм да орсӧм
Масленича кежӧ пасьтасьӧм лоӧ вежалунлӧн тӧдчана элементӧн, кӧда медӧддьӧн матынжыка йитӧ сійӧ карнаваллэзкӧт. Роч да советскӧй этнограффез юӧртӧм сьӧрті, маскаррес пасьтасисӧ пода да вӧрпаӧ (вӧв, козёл, ӧш, ош, курӧг), лёк вынӧн (чёрт, вӧрись, кикимора), куллӧмезӧн (пӧрись дед, пӧрись инька, кӧднаын вӧлі кулӧммез мирлӧн пас) нето йӧзморттэзӧн (ветлӧтісь, эмтӧм, пӧрись инька, изісь, цыган, турок). Маскар ветлӧтӧмыс вӧлісӧ ассяма парадӧн, кӧда аркмӧтіс хаослісь картина, кӧда колӧ вӧлі мирлӧн тулысся вильмӧтӧм понда да мирын арт видзӧм понда. Апогейӧн вӧлі Масленича акань дзебӧм, кӧда вӧлі важсянь кольччӧм символӧн. Сія тыдаліс, шуам, Масленича аканьсӧ важ да важмӧм паськӧмӧ пасьтӧтан практикаын[6].
Маскаралӧм киння, традиционнӧй Масленича костася гажӧтчӧмыс йитӧм би да чожа символикакӧт. Сэтчӧ пырӧны бипуррез, кӧдна йитӧмӧсь «кулӧммесӧ шонтӧмкӧт», сотчан гӧгыль, доддялӧм вӧввезӧн гӧняйтӧм да керӧссэз вылісь ысласьӧм, дютяннэз, кытшын йӧктӧммез (хоровод, коло), специальнӧй Масленича костася сьыланнэз сьылӧм, кӧдна абу лӧсьытӧсь нето аграрнӧй темааӧсь (шуам, «шабді понда»)[1].
Карся культураын вӧлісӧ паськалӧмӧсь Масленича балаганнэз, ош гажӧтчӧммез, кипоння тышккез да военнӧй орсаннэз, кыдз «лымья кар босьтӧм»[2].
Гажӧтчӧмлісь чужтан вынкӧт йитӧмсӧ позьӧ нуӧтны темаэз пыр. Серӧмсора нераннэз да сьыланкыввез, жесттэз, умӧль кыввез висьталӧм, кушӧтчӧм да паськӧм вежӧм ӧтік кадӧ петкӧтӧны сералӧм, кӧдалӧн традиционнӧй культураын эм олан вын, и саймӧтӧны керан вын. Фольклорнӧй масленичнӧй эротика ӧтпырйӧ содтӧ карнавальнӧй хаослісь эффектсӧ, отсалӧ му да пода чужтӧмлӧ да мыччалӧ фертильнӧй волыда том отирлӧн матримониальнӧй йитӧттэз перспективаын, мый лоӧ гӧтрасян одззася орсан формаӧн[7][8].
Масленича дзебӧм
Масленича медбӧрья лунас лӧсьӧтлісӧ ыджыт бипуррез. Том отир кытшӧвтісӧ йӧррез, ӧктісӧ чаг да уввез, вайисӧ кольтаэз — быдӧс этӧ тэчисӧ ӧтік чукӧрӧ да ӧзтісӧ. Биӧ чапкывлісӧ ёг да важ кӧлуй (шуам, пыжжез нето пестеррез): ковтӧм кӧлуй сотӧм вӧлі вуджӧмӧн, важ во кольлалӧмӧн да виль во панталӧм пасӧн. Бипурӧ содтывлісӧ идзас. Мувӧдитӧмас идзасыслӧн, кӧда вӧлі йитӧм сюӧн да няньӧн, вӧлі торья дон[2].
Масленича акань дзебӧм чулӧтсьывліс паськыта, сія ӧтлаӧтӧ кулан темасӧ тырдоз темакӧт. Сы чулӧтӧмыс вежласьӧ регионсянь регионӧ да деревнясянь деревняӧ, но кытшӧм бы эз вӧв, сэтчӧ пырӧ аканьӧсь нето ловья мортӧс Масленичаӧн шуӧм да сыкӧт пантасьӧм, пародийнӧй «дзебсян процессия» да, медбӧрын, акань кӧ, торрез вылӧ ритуальнӧя орӧтӧм, сыбӧрын коляссэсӧ ыб вылӧ чапкӧм. Кыдз «дзебсян процессия», сідз и кыскалӧм коста сералісӧ да горӧтлісӧ. Масленичаыс вермис лоны кыдз ай, сідз и ин персонажӧн, да и тӧдчӧтӧм айпӧв нето иньпӧв пассэзӧн[4].
Сёрӧнжык аркмис акань сотӧм. Медбӧрын бипур нето акань сотӧм ӧтлаӧтлісӧ кык вежӧртас: «дзебӧмыс» мыччаліс важ во да тӧв колльӧтӧм, а биыслӧн югытыс да дзирдыс — виль олан шогмӧм, шонді да локтан шоныт[2].
Мылыштӧм
Вичкуся обычай корны ӧтамӧдлісь мылыштӧм сетіс ним Масленича медбӧрья лунлӧ — Прощёнӧй кресення[1]. Сія лунӧ быдӧс гажӧтчӧмыс помассис рытся сёян пондӧтчӧмӧдз, кӧда коста мылыштасисӧ. Семьяӧ пыриссезлісь корлӧмась мылышт гортаныс, вӧлӧм обычай, мед айка ныввез челядьӧн сія лунӧ тожӧ вовлӧмась айыс дынӧ да мунтӧдз мылыштасьӧмась. Учӧтжыккес копыртчӧмӧн корисӧ мылышт ыджытжыккеслісь, сыбӧрын ыджытжыккес корисӧ томмезлісь, да сыбӧрын мылышт могись куимись окасисӧ[2].
Историческӧй гижалӧм
Масленича костася роч традицияэз йылісь медодзза гижӧттэз вӧлісӧ лӧсьӧтӧмӧсь визирсайся отирӧн, кӧдна вовлісӧ Великӧй княжество Московскӧйӧ. Сигизмунд Герберштейн (1526 во) юӧртӧ, мый Ыджыт видзлӧн медодзза недельыс «московиттэслӧн» «шусьӧ Syrna, мый лоӧ „рися“ (латин. caseacea), нія сёйӧны йӧла сёян». Сідзжӧ сія касьтылӧ Масленичасӧ (нем. Faschang) вежалуннэз лыдыг, кӧдна коста отирлӧ позьӧ юны кодззӧтан юаннэз[9].
Ричард Ченслер (1553 во) гижӧ, мый Ыджыт видз одззася недельсӧ роччес «шуӧны „виаӧн“ (англ. Butterweek), да сы коста сёйӧны дзир йӧв да ви. Ме чайта, мый сэтшӧм кодалӧмыс эсся оз овлы мӧдік канмуэзын»[10].
Жак Маржерет (1606 во) содтӧ юӧррезас этшшӧм гижалӧм Прощёнӧй кресення йылісь:
Вовлӧны ӧтамӧдныс дынӧ, окасьӧны, бурасьӧны, лӧгӧтісӧ кӧ кытшӧмкӧ кылӧн нето лёк керӧмӧн; пантасьлӧм коста, кӧть одзжык некӧр эзӧ адззисьлӧ, — весись ыб вылын пантасьӧны ӧтамӧдныскӧт окасьӧмӧн. Мылышт менӧ, — шуӧ ӧтік; Еныс тэнӧ мылыштас, — шуӧ мӧдік.
— «Российскӧй державалӧн да Московскӧй великӧй княжестволӧн состояннё», Маржерет
Адам Олеарий (1647 во) касьтылӧ Масленича костася кодалӧм йылісь:
Видзыслісь медодзза недельсӧ нія шуӧны масленичаӧн, кӧр нія озӧ сёйӧ не яй, не чери, а дзир ви, йӧв да кольть, сэк жӧ сэтшӧм бура юӧны быд лун вина, ма да сур да чӧсмасьӧны сідз, мый сэсся асьныс асьнысӧ озӧ тӧдӧ; этасянь аркмӧны ыджыт вушйӧм да кодалӧм, а одзжык и тышкасьлісӧ да вийлісӧ. Мӧдік недель сьӧрна нія пондӧтӧны овны лӧня, сёйӧны дзир ма да карч, юӧны ырӧн да ва, ветлӧны пывсьыны, пӧсялӧны да мисськӧны одзза недельӧн керӧм умӧльсӧ[11].
Масленича советскӧй кадӧ
Октябрьскӧй революция бӧрын пондӧтісӧ вермасьны религиознӧй вежалуннэз паныт, кӧднӧ вежисӧ антирелигиознӧй донтан луннэзӧн:
Важ масленича сы гуляйтӧмись да юӧмись кидсьӧмӧн Гӧрд масленичасӧ пондасӧ чулӧтны деревняын культурнӧй гажӧтчӧмӧн да виль олан пропагандируйтӧмӧн.
— Красная масленица // Известия. 1923 во одзтӧв 14 лун
Но антирелигиознӧй оськалӧммез эзӧ ӧктӧ уна отир и вежалуныс ӧшис официальнӧй календарьись 1920 воэз шӧрӧдз ни.
Масленица нимыс пондӧтчӧ бертны 1960 воэз помын. Масленичаыс лоӧ каррезын массовӧй донтан лунӧн, кӧдӧ организуйтӧны культураын уджаліссез, кӧдна уджалӧны лӧсьӧтӧм ни методическӧй материаллэзӧн. Вежалуныс лоӧ стандартизируйтӧм канму пасьта, уналаын мунӧ паныт оліссез традицияэзлӧ, кӧдналӧ сетсьӧ видзӧтіссезлӧн пассивнӧй роль. Сэк жӧ Масленича символлэзлӧ да традицияэзлӧ дзебсян-касьтісян нет фертильно-оргиастическӧйез туйӧ сетсьӧны солярнӧй интерпретацияэз[12].
Постсоветскӧй Россияын
Одзжык Масленича чулӧтӧмыс организуйтсис асьныс участниккезӧн (акань керӧм, ӧтлаын бипуррез лӧсьӧтӧм да ӧзтӧм, нійӧ сотӧм, карнавалӧн мунӧм, орсӧм), XIX сёвося карся контекстын сія унажык босьтӧ институционально-организованнӧй, «вылісянь» сетӧм формат. Отира отаиннэзын, медодз карся парккезын, чулӧтӧны ярмаркаэз да конкурссэз, практикуйтӧны блиннэзӧн гӧститӧтӧм да акань сотӧм, да бӧрьяыс керсьӧ не пыр медбӧрья лунас. Сэтшӧм жӧ сценарийез сьӧрті и уджалӧны велӧтаніннэзын, кытӧн челядь понда чулӧтӧны тематическӧй донтан луннэз нія жӧ элементтэзӧн[12].
Ӧнняся сотан практикаэз сьӧрті одзлань петӧ иньпӧла маркируйтӧм акань да ныӧ озӧ пырӧ пародийнӧй «дзебсян» процессияэз, кӧдна характернӧйӧсь традиционнӧй местнӧй варианттэз понда. Кӧть массовӧй Масленичаыс редуцируйтсьӧ гажӧтчан мероприяттёӧдз, символическӧй йитӧттэс кольччӧны интерпретацияэзын: акань сотӧм йитсьӧ тӧв кольлалӧмӧн, а бипурлӧн шонытыс — локтан шоныт да тулысся-гожумся шонді видзчисьӧмкӧт. Быдсӧн ӧнняся донтан лунсӧ позьӧ гижавны кыдз традиционнӧй ритуал мыччалан реконструктивнӧй (да мымдакӧ сценическӧй) форма[12][13].
Масленичасӧ чулӧтлылӧны уджалан коллективзэзын, паськалӧм гӧститчыны ветлӧм.
«Блин индекс»
Традиция сьӧрті Масленича одзын СМИ-ын йӧзӧтӧны «блин индекс» .
2025 во тӧвпомӧн «Бизнес FM» арталіс, мый Россия пасьта шӧркодя блиннэзлӧн порцияыс (парӧгтӧг да содтӧттэзтӧг) лоас 150 мымда руб дона[14].
2026 во тӧвпомӧн Росстат арталіс, мый быдӧс семья понда блин лӧсьӧтӧм понда сёян-юан чукӧрлӧн доныс лоас 208,9 руб[15].
Висьталлӧмез рочӧн
- Не всё коту Масленица, будет и Великий пост.
- Не по все дни свадьба, не всегда коту Масленица.
- Пируй и гуляй баба на Масленице, а про пост вспоминай.
- Масленица объедуха, деньгам приберуха.
- Выпили пиво об Масленице, а с похмелья ломало после Радуницы.
- Масленица — семикова племянница.
Масленича кодь вежалуннэз мӧдіклаын
- Мясопуст — славяна-католиккез
- Мясопуст, нето Фашанк — чеххез, словаккез
- Запусты, нето Остатки — поляккез
- Курентованье — словенса
- Пожумкӧт гӧтрасьӧм — словенса
- Фашник — хорваттэз
- Звончары — хорваттэз
- Бушояраш — шокса (хорваттэз Венгрияын)
- Покладе — серббез
- Вастлавьи — датчана, норвеггез, ойвывся немеццез, эстонеццез, латышшез
- Фастнахт — лунвывся немеццез, австрийса, швейцарса
- Марди Гра — франккывья европейса, американеццез
- Юр сетан лун, или Блин лун — англокывья европейса, американеццез, австралийса
- Карнавал — рытвывся христиана
- Бун Барекендан — армяна
- Ужгавенес — литовса
- Метени — латышшез
- Апокриес — греккез
- Ласкиайнен — финнэз
Масленича искусствоын
- «Не всё коту масленица» — Александра Островскийлӧн пьеса (1871 во)
- «Ишь ты, Масленица!» — режиссёр Роберт Саакянцлӧн серпасалӧм мультфильм (1985 во)
- «Сибирский цирюльник» — режиссёр Никита Михалковлӧн фильм (1998 во). Масленича порйӧтӧм Россияын 1885 воӧ эпизод
- «Февраль. Масленица» — «Времена года» — П. И. Чайковскийлӧн фортепиано йикл
- «Проводы Масленицы» — Н. А. Римский-Корсаковлӧн «Снегурочка» операись сцена
- Народные гулянья на Масленой — И. Ф. Стравинскийлӧн «Петрушка» балетісь картина
- «Масленица» — Борис Кустодиевлӧн серпас (1916 во)
- «Взятие снежного городка» — Василий Суриковлӧн серпас (1891 во)
Пасйӧттэз
- ↑ 1 2 3 4 5 6 7 8 Ма́сленица // Большая российская энциклопедия.
- ↑ 1 2 3 4 5 6 7 8 Шангина И., Некрылова, А. Русские праздники. — Санкт-Петербург: Азбука, 2015. — С. 48–61.
- ↑ 1 2 Зеленин, Дмитрий Константинович. Восточнославянская этнография. — Москва: Наука. Главная редакция восточной литературы, 1991. — С. 407.
- ↑ 1 2 3 4 5 6 7 8 Пропп, Владимир Яковлевич. Русские аграрные праздники. — Санкт-Петербург: Азбука, 1995. — С. 28–29, 36.
- ↑ Масленица - православная энциклопедия «Азбука веры», Православный портал «Азбука веры». Дата обращения: 25 Тӧвпом 2026.
- ↑ 1 2 3 4 Байбурин, А.К. Ритуал в традиционной культуре: структурно-семантический анализ восточнославянских обрядов. — Санкт-Петербург: Наука, 1993. — С. 88, 132–134.
- ↑ Пропп, В.Я. Проблемы комизма и смеха. — Москва: Лабиринт, 2002. — С. 133–135.
- ↑ Агапкина, Т.А. Мифопоэтические основы славянского фольклорного календаря. Весенне-летний цикл. — Москва: Индрик, 2002. — С. 183–195.
- ↑ Герберштейн С. Записки о Московии рус..
- ↑ Ченслор Р. Путь из Англии в Москву рус..Архивная копия от 26 Тӧвпом 2020 на Wayback Machine // Английские путешественники в Московском государстве в XVI веке. Л., 1937.
- ↑ Олеарий А. Описание путешествия Голштинского посольства в Московию и Персию рус..
- ↑ 1 2 3 Русская Масленица – без блинов и чучела, s-t-o-l.com, s-t-o-l.com. Дата обращения: 12 Тӧвпом 2026.
- ↑ В Петербурге сожгли чучело Масленицы огнеметом (фото), Росбалт. Дата обращения: 18 Одзтулыс 2024.
- ↑ Как за год изменился «индекс блина» на Масленицу?, BFM.ru (24 Тӧвпом 2025). Дата обращения: 24 Тӧвпом 2025.
- ↑ В России подсчитали стоимость блинов на Масленицу в 2026 году | Эксперт рус..
Литература
- Байбурин А. К. Ритуал в традиционной культуре. СПб, 1993.
- Бахтин М. Творчество Франсуа Рабле и народная культура Средневековья и Ренессанса. М.: Худ. лит., 1990.
- Виноградова Л. Н. Зимняя календарная поэзия западных и восточных славян. М., 1982.
- Ивлева Л. М. Ряженье в русской традиционной культуре. СП, 1994.
- Пропп В. Я. Проблемы комизма и смеха. Л, 1976.
- Пропп В. Я. Русские аграрные праздники. Л., 1963.
- Толстая С. М. Полесский народный календарь. М., 2005.
- Славянские древности. Этнолингвистический словарь. В 5 т. Т.3. С. 194—199. М., 2004.
- Некрылова А. Ф. Русские народные городские праздники, увеселения и зрелища. Л., 1988.
- Шангина И.И, Некрылова А. Ф. Русские праздники. СПб, 2015.