Кӧзок мичӧтаннэз
Кӧзок мичӧтаннэз — гӧгляноккез, фигуркаэз да мӧдік мичӧтаннэз, кӧднӧн мичӧтӧны вильвося нето розосвося кӧзок, а сідзжӧ оланінлісь интерьер да экстерьер Виль во да Розосво порйӧтӧм кежӧ.
Кӧз мичӧтӧм история
Кӧз мичӧтӧм кыдз Розосво кадся гортся атрибут аркмис XVII сёво медодзза джынын Германияын да Прибалтикаын. Медодзза мичӧтаннэс вӧлісӧ керӧмӧсь кристианскӧй символика сьӧрті: йыв вывся мичӧтанӧн вӧлі Вифлеемись кӧдзув, а уввез вылӧ кышӧтлісӧ яблоккез кыдз Бур да Лёк тӧдӧм пу вылісь карч символ, сувтӧтчисӧ да ӧзтіссисӧ масіссез кыдз идӧг сӧстӧмлӧн символ. Традиция челядь понда тодилялӧмӧн мичӧтаннэз вежсисӧ, кӧз вылас пондісӧ ӧшлыны керӧтӧм мичӧтаннэз, чӧскытторрез да ӧреккез[1].
Ӧтік важ висьтас сьӧрті, медодзза стеклоись керӧм кӧзок мичӧтаннэсӧ пондісӧ керны XVI сёвоын Саксонияын[1], одзжык медодзза документируйтӧм розосвося пу сувтӧтӧмся. Мӧдік важ висьт йитӧ ны керӧтӧмсӧ1848 воӧ Германияын яблоккес умӧль воӧмӧн. Сэк Тюрингияись Лауша нима олӧминын стеклопӧльтіссез керисӧ яблоккесӧ стеклоись да кужисӧ бура вузавны, мый бӧрсянь пондӧтчис мичӧтаннэз керӧтӧм. Сэсся ни нійӧ пондісӧ пӧльтӧтны Саксонияын. Сьӧкыт висьтавны, вӧлі кӧ эта вӧвлытӧмтор да кыдз сія йитӧм стеклопӧльтіссез вермасьӧмӧн. Кольччӧ фактӧн, мый XIX cёво шӧрсянь Лаушаын стекло пӧльтӧм кольччӧ кӧзок мичӧтаннэз медважся керӧтӧмӧн. 1867 воын сэтчин вӧлі осьтӧм ыджыт газ завод, кытӧн мастеррес ыджыт температура газовӧй горелкаэз отсӧтӧн пӧльтісӧ ыджыт воснит гӧгляннэз[2].
1903 воӧ Лаушаын вӧлі осьтӧм Художествоа стекло музей, кӧдаын мыччалӧны кӧзок мичӧтаннэзісь коллекция. Традиция мичӧтны кӧзоксӧ сотчана масіссезӧн ӧддьӧн сотчанопаса, но отирыс мунісӧ риск вылӧ мед видзны традиция. Идея пользуйтны ӧддьӧнжык опастӧм электрогирлянда аркмис 1870-ӧт воэз помын американскӧй телеграфистлӧн Ральф Моррислӧн Виль Англияись. Сы коста сигнальнӧй электролампочка суниссэз видзисӧ ни телефон пульттэзын, Моррислӧ медодззалӧ пырис юрас ӧшлыны нійӧ кӧзок вылӧ. Идеясӧ ошкисӧ сы коллегаэс, а сэсся нійӧ кутчисӧ керӧтны. 1895 воын США-ын вӧлі керӧтӧм медодзза ӧтӧрся вильво кежся электрогирлянда, сійӧн мичӧтісӧ Вайт Хаус одзись кӧз[2].
СССР-ын да Россияын
Медодзза кӧзок мичӧтаннэз лоисӧ Россияын 1830—1840-ӧт воэзӧ. Унажыкыс вӧлісӧ аскерӧм чачаэз да чӧскытторрез. Унаӧн используйтны кӧзок мичӧтаннэсӧ пондісӧ XIX севӧ медбӧрья джынсянь. Российскӧй империяын мичӧтан керӧтӧм вӧлі не сэтшӧм ыджыт, нійӧ уна вайлісӧ вежалуннэз кеж Европаись, медодз Германияись, кӧдаын керӧтӧмыс чукӧртсис Нюрнбергын да Берлинын[3]. Медважся мичӧтаннэз керӧтӧм стеклопӧльтан уджаліс Клинскӧй уездісь Круговскӧй волосьтын, сійӧ аркмӧтіс А. С. Меншиков 1848 воын. Керӧтӧмыс вӧлі осьтӧм сэтчин, сідз кыдз неылын адззисӧ кварц[3]. Продукция вӧлі керӧтӧм бура, мый йылісь 1861 да 1865 воэзӧ Российскӧй мануфактурнӧй выставкаэз вылын сылӧ вӧлі сетӧм эзысь медаль, да сідзжӧ 1889 воын Парижын чулалӧм Мирпасьта выставка вылын. Эта традицияыс эз ор да мунӧ ӧнӧдз вуджӧтӧм ОАО «Ёлочка» ордчча Высоковскӧ. Сы дорын эм кӧз мичӧтан музей[4], кытӧн видзӧны медшоч «Самовар» нима стеклоись керӧм кӧз мичӧтан[3].
Революция бӧрын Розосво порйӧтӧм пондіс дугдіссьыны, 1929 воӧ вӧлі официальнӧя кидтӧм. Но Круговскӧй волостяс миӧчтаннэсӧ керисӧ кидтан кадӧдз[3]. Сы дырйи мичӧтаннэсӧ керисӧ аркиллезӧн да кык ыджыт фабикаын, кӧднӧ аркмӧтіс Московскӧй кооперативнӧй прмусловӧй союз. Чожа мыйись сія кидмӧтіс вузавны мичӧтаннэсӧ. Кольчиссӧ мукӧд аркиль. Кидтан дырся мичӧтаннэз ӧння кадӧ лыддиссьӧны медшоч да меддона коллекционнӧй советскӧй кӧз мичӧтаннэзӧн.
Ситуацияыс вежсис 1935 во одзтӧв 28 лунӧ, кӧр П. П. Постышев корис «Правда» газетаӧт бертӧтны вежалунсӧ советскӧй челядь понда[3]. Баитсис не Розосво, а Виль во мичӧтӧм кӧзӧн панталӧм йылісь. сы кадӧ быдӧс вичкуся вежалуннэсис дугдӧтісӧ религиознӧй вежӧртас. Сы бӧрын бертіс и кӧз мичӧтаннэз керӧтӧм.
- Кватьйывья зарниа нето чочкӧм Вифлеем кӧдзув пыдди лоис витйывья гӧрд. Сы коста пондісӧ кӧззэс йылӧ кышӧтлыны мичайыввез («пики»).
- Гӧгляннэз да идӧггез пыдди лоисӧ быдберся морт, вӧрпа, фрукт да карч фигуркаэз. Сымда уна формаӧт советскӧй кӧззэс торьяссисӧ европаись кӧззэзсянь, кытӧн мичӧтаннэз унажыксӧ вӧлісӧ ӧтіформааӧсь[4].
1937 воын Клинскӧй районын оссисӧ мичӧтан керӧтан аркиллез[3]. Великӧй Отечественнӧй война бӧрын Лауша карыс лоис ГДР-ын. Сійӧн СССР пондіс сэтчинісь небны кӧз мичӧтаннэсӧ тодиль экспортӧн. Мичӧтан ӧктӧтас пырисӧ: йыв, рӧма 16 гӧглян да 5 мӧдік формаа мичӧтан. Эна кӧз мичӧтан ӧктӧттэс СССР-ын вӧлісӧ дефицитӧн, кӧть и донныс вӧлі ыджыт (1983 воӧ ӧтік ӧктӧтлӧн доныс вӧлі 9 руб).
1930-ӧт воэз шӧрсянь 1960-ӧт воэз шӧрӧдз кӧз мичӧтаннэсӧ керисӧ киэзӧн, мый кузя нія вӧлісӧ зэв оригинальнӧйезӧн.
Одзза кадӧ мичӧтан керӧтӧмын уджалісӧ ватаӧн (1930—1950 вз.), сэсся сійӧ вежис картон, сёрӧнжык унажык мичӧтаннэсӧ пондісӧ керны стеклоись.
Ӧння кадӧ кӧз мичӧтан ассортиментыс ӧткодь европейскӧйкӧт. Унажыкыс ассортиментсис керсьӧ Китайын.
Европаын
XIX—XX сёвоэз вуджикӧ Дрезденын вӧлі осьтӧм кӧз мичӧтаннэз керӧтӧм, кӧда сэсся лоис карлӧн визитнӧй карточкаӧн. Мичӧтаннэсӧ керисӧ прессуйтӧм картӧнісь. Вӧлі кык чача: ляпкытӧсь да гӧгрӧсаӧсь. Мичӧтаннэсӧ вевттисӧ фольгаӧн да рӧмсьӧтісӧ, мед нія пежьялісӧ масісь бисянь. Чачаэсӧ керисӧ кайез, вӧрпаэз да гаггэз кодьӧсь.
Сы коста Бреслауын мичӧтаннэсӧ керӧтісӧ бумагаись да ватаись.
Германии кӧз мичӧтаннэз керӧтӧмын уджалісӧ хромолитография техникаӧн[5].
Англияын да США-ын
Розосво кежӧ мичӧтны кӧз традицияыс локтіс Британияӧ немецкӧй иммигранттэзкӧт XIX сёво одзын да ӧтлаасис кельтскӧй да друидическӧй традицияэзӧн, медодз омела культӧн. Лыддиссис, мый омелаись керӧм кытш вермӧ сӧстӧмтны асгӧгӧрсӧ, сы увтын пантасьӧм вермасиссес пӧ колясӧ оружиесӧ да озӧ босьтӧ киӧ ашынӧдз. Омела кытш увтын окасьӧм лыддиссис сӧстӧмӧн жӧ. Розосво вильь традцияэзкӧт комбинацияын аркмис розосвося кытш кыдз керку ыбӧс да пытшк мичӧтан[2].
Кельтскӧй традицияӧн лыддиссьӧ кӧз д керку мичӧтӧм падуб гӧрд ягӧда уввезӧн. Кытӧн сія оз быдмы, мичӧтлісӧ сы кодь пуэсӧ, ӧння кадӧ небӧны сы керӧтӧм имитацияэз.
США-ӧ кӧз мичӧтан традциясӧ ваисӧ сідзжӧ немецкӧй иммигранттэз, сія паськаліс 1850 воын. Сэк иньпӧлӧс понда альманах «Godey’s Lady’s Book» лэдзис гравюра «Розосвося кӧз дынын королевскӧй семья». Сія вӧлі невна американизируйтӧм (паськӧм да юрсиэзӧт) версия 1847 вося британскӧй «Illustrated London News» гравюралӧн. Гравюра вылас мичӧтӧм кӧз дорын вӧлісӧ серпасалӧмӧсь козиннэз да том королева Виктория Альберт айканас да челядьнас. Эта гравюра сьӧрті США-ын дыр мичӧтісӧ Розосвося кӧззэсӧ.
Азияын
Китайын кӧззэс туйӧ мичӧтӧны апельсин да мандарин пуэз — сідз шуана Шонді пуэз. Мичӧтӧны сахаритӧм фрукттэзӧн да дзоридзззезӧн, а сідзжӧ ӧшлӧны гижӧм кӧсйӧммез[6].
Японияын, кытӧн кӧззэс пантасьлӧны шоча, мичӧтӧм понда бӧрйӧны бонсайес, учӧт пожуммез. Синтоизмӧ пыртӧм японеццез лыдььӧны пожумсӧ дыр олӧм символӧн, а бамбуксӧ — вын да етш символӧн. Быдмассэсӧ ӧктӧны кадомацу — вильвося композиция, сӧдтӧны сыӧ ягӧддэз да саридз быдмассэз. Кӧззэс туйӧ японеццес керкуэзаныс сувтӧтӧны бадь нето бамбук уввез, мичӧтӧны нійӧ дзоридззезӧн, фрукттэзӧн да моти гӧгляннэзӧн[7].
Мӧдік странаэзын
Медодзза кӧз мичӧтаннэсӧ пондісӧ керны XIX сёво шорын. Нія вӧлісӧ стеклоись керӧм гӧгляннэз, пытшксяняс вӧснита вевттьӧмӧсь шырисьӧн.
| Канму | Аскодь |
|---|---|
 Бразилия |
Бразилияын Виль воыс лӧсялӧ гожумӧ. Сэтчин кӧззэсӧ мичӧтӧны хлопок торрезӧн, бытьтӧ кӧзыс вевттӧм лымӧн. |
 Гватемала |
Гватемалаын кӧзсӧ мичӧтӧны Библияись фигуркаэзӧн. |
 Гренландия |
Гренландияӧ кӧззэсӧ вайӧны, сідз кыдз сы климатын кӧззэс оз быдмӧ. Нійӧ мичӧтӧны масіссезӧн да мича серрезӧн. |
 Ирландия |
Ирландияын кӧззэсӧ мичӧтӧны рӧма шырбиэзӧн да мишураӧн, гӧгляннэс абу популярнӧйӧсь. |
 Мексика |
Мексикаын керкуэзнысӧ мичӧтӧны Библияись Исус Кристос чужӧм мыччалана композицияӧн (исп. El Nacimiento). Мичӧтӧм кӧзыс керкуэзаныс эм жӧ. |
 Швеция |
Швецияын кӧззэсӧ мичӧтӧны кӧдзуввезӧн, шонді да лымчир кодь чачаэзӧн, идзасісь да пуись керӧм пода фигуркаэзӧн. |
 Дания |
Данияын кӧз мичӧтаннэз туйӧ ӧшлӧны гӧрд да чочком бумагись керӧм сьӧлӧммеӧн, кӧдна пытшкын ӧреккез да конфеткаэз. |
 Франция |
Францияын кӧззэсӧ мичӧтӧны гӧрд яблоккез кодь стеклоись керӧм гӧгляннэзӧн. |
Галерея
- Статьяын гижӧмыс сьӧрті
Челядь да Санта Клаус «Клауслӧн пу» дынын (нем. Klausbaum). «50 серпаса басня челядь понда» нима немецкӧй небӧгись гравюра. 
«Пувез кытш увтын», английскӧй гравюра, 1873 во 
Розосвося кӧзок дынын семья. «Godey's Lady's Book» нима американскӧй альманахись гравюра, 1850 во 
Кӧзок мичӧтан «Гӧрд боец», СССР, 1950-ӧт воэз 
Кӧзок мичӧтан «Космонавт», СССР, 1960-ӧт воэз 
Кӧзок мичӧтаннэза коробья, СССР, 1980-ӧт воэз 
Германияись Розосвося традиционнӧй атрибуттэза кытш 
«Типпа элле гоппа» (швед. Typpa eller goppa), идзасісь керӧм акань, кӧдӧн одзык ворожитчисӧ.Швецияись розосвося кӧзок мичӧтан. 
Калифорнияись уна мичӧтӧм Розосво кеж керку
Пасйӧттэз
- ↑ 1 2 История ёлочных игрушек. TUT.BY. Дата обращения: 14 декабря 2013. Архивировано из оригинала 16 декабря 2013 года.
- ↑ 1 2 3 Иван Охапкин. Ёлочные украшения: история одной традиции. Наука и технологии России. Дата обращения: 14 декабря 2013. Архивировано из оригинала 16 декабря 2013 года.
- ↑ 1 2 3 4 5 6 С. Горожанина. Хрупкое чудо (русский) // Антиквариат, предметы искусства и коллекционирования : журнал. — 2006. — Декабрь (№ 12 (43)). — С. 6—11.
- ↑ 1 2 Наталья Соколова. История страны на ёлке. Русское географическое общество. Дата обращения: 14 декабря 2013. Архивировано из оригинала 16 декабря 2013 года.
- ↑ К. Балашак. Спутники праздника (русский) // Антиквариат, предметы искусства и коллекционирования : журнал. — 2004. — Декабрь (№ 12 (23)). — С. 10—13.
- ↑ Editorial, Marie Claire. Елки, палки, мандарины: как украшают новогодние деревья в разных странах мира, Marie Claire. Дата обращения: 22 Арпом 2024.
- ↑ Бамбуковое дерево и почтовые открытки: как отмечают Новый год в Японии? (25.12.2020).
Лыддьӧтан
- Ёлочные украшения // Краткая энциклопедия домашнего хозяйства / под ред. А. И. Ревина. — М.: Советская энциклопедия, 1960. — Т. 1. — С. 189—190. — 770 с.
- Душечкина Е. В. Украшение ёлки. Ёлочные игрушки // Русская ёлка. История, мифология, литература. — СПб.: Изд-во Европейского университета в С.-Петербурге, 2012. — 360 с. — 1000 экз. — ISBN 978-5-94380-120-4.
- Иванов С. А. Ёлочные игрушки // 1000 лет озарений. Удивительные истории простых вещей / С. Б. Пархоменко. — М.: Вокруг света, 2010. — С. 83. — 232 с. — 10 000 экз. — ISBN 978-5-98652-351-4.
- Сальникова А. А. История ёлочной игрушки, или как наряжали советскую ёлку. — НЛО, 2011. — 234 с. — (Культура повседневности). — 2000 экз. — ISBN 978-5-86793-835-2.