Квадробер
| Квадробер | |
|---|---|
 | |
| Аркмӧм | 2020 |
| Паськалӧм | Мир пасьта |
Квадро́бер (лат. quattuor — «нёль» да англ. aerobics — «аэробика») — квадробикаӧн занимайтчись морт, абу официальнӧй спорт, 7-14 вося субкультура мыччалісь. Квадроберрес кышӧтӧны пода да вӧрпа маскаэз да видзӧны асьнысӧ ны моз[1].
Квадроберрес йылісь нуӧтӧны дискуссия философфез, психологгез да психиатррез, политиккез[2].
Россияын квадроберрес дынӧ интерес медӧтіс бизнессӧ пондӧтчыны керны ны понда берсятор. Маркетплейссэз вылын вузассьӧны квадроберрез понда парфюмерия, керӧтӧм куись атрибутика, вердас да мӧдік вузалантор. Субкультура понда вузаланторӧн пондіс рекламируйтчыны нельки сэтшӧм продукция, кӧда сыкӧт некыдз абу йитӧм[3].
Синбан да асвидзӧм
Квадроберрес бӧрйӧны аслыныс гленитчана пода нето вӧрпа да лӧсьӧтӧны сы кодь синбан кышалӧм коккез, пеллез да бӧж отсӧтӧн. Тшӧкыта квадроберрес асьныс керӧны костюм торрезнысӧ, мукӧд квадроберрес пасьтасьӧны костюмас быдсӧн[4], имитируйтӧны сылісь ветлӧтӧмсӧ, овмӧтчӧны мӧдік квадроберрескӧт, пуктіссьӧны «чукӧрас». Квадроберрес велӧтчӧны борйӧм пода нето вӧрпа моз котрасьны, чеччавны, орсны турун вылын. Квадробика радейтіссез лӧсьӧтӧны асланыс персонажжезлісь историяэз, ӧтвутчӧны офлайн да онлайн группаэзӧ, ӧксьывлӧны сходкаэзӧ, снимайтӧны роликкез соцвеззэз понда[5] да юксьӧны опытӧн ӧтамӧдныскӧт [6].
Спорт да субкультура
Квадроберрес керӧны аэробнӧй упражненнёэз: местаын котӧртӧм, потш весьтӧт чеччалӧм да с.о. Сы дырни квадроберреслӧн синбаныс мыччалӧ нылісь субкультураӧ пырӧмсӧ. Сэтшӧм сора кузя оз позь торйӧтны квадробер спортсменнэсӧ неформальнӧй движеннёӧ пыриссезсянь. Но овлывлӧ и сідз, мый субкультура зоралӧ спорт дисципилинаӧ, шуам, хоббихорсингӧ[7].
Квадроберрез, тарианнэз, фурриэз
Квадроберрезлӧн синбан вачкисьӧ мӧдік субкультура вылӧ — фурри. Но эмӧсь мымдакӧ принципиальнӧй торъялӧммез: квадроберрес пондылӧны мычаввны пода нето вӧрпа ветлӧтӧмсӧ топ, фурриэс мыччалӧны антропоморфнӧй (морт кодь) пода нето вӧрпа. Квадроберрес ӧддьӧнжыксӧ занимайтчӧны аэробикаӧн, фурриэс видзӧны ассиныс синбаннысӧ творчество понда[8]. Квадроберрес коласын пантасьлӧны терианнэз нето териантроппез, морттэз, кӧдна озӧ сідз туйӧ видзӧ асьнысӧ кыдз пода нето вӧрпа, а пуктӧны асьнысӧ сэтшӧммезӧн[9].
Паськалӧм
Квадроберреслӧн медоддза «ВКонтакте» соцвезын чукӧр вӧлі аркмӧтӧм 2022 во одзтулысӧ. 2024 во арпом кеж вӧлісӧ 46 сэтшӧм чукӧр 17 503 гижӧтчись лыда ӧтласа аудиторияӧн. Сідзкӧ Рунетын квадробинг — неыджыт лоӧмтор[10]. Но 2024 во гожумпом 31 лунся Надымын сьылісь Миа Бойко концерт вылын вӧлӧм инцидент бӧрын, кӧр сцена вылӧ петіс нылочка-квадробер[11], СМИ-ын да соцвеззэзын эта темаыс йылісь касьтылӧм лыдыс уна содіс (лункӧлӧ 5,1 сюрссянь 30 сюрсӧдз). Пондӧтчис паськыт общественнӧй дискуссия, кытчӧ кутчисисӧ Федерация Советісь сенаторрез да Госдумаись депутаттэз, а сідзжӧ медиа- да политтехнология сьӧрті специалисттэз[10].
Ӧні темаыс йылісь уна сёрнитана, тшӧтш общественнӧй мненнё лидеррез да политиккез коласын, да быд виль ролик петӧмӧн нето быд виль висьталӧмӧн сія одззӧтчӧ вились, — Игорь Лащевский, АГТ коммуникационнӧй агентство директор[10].
Законнэз сьӧрті лӧсьӧтӧм
2024 во аршӧрӧ Госдума депутат Сергей Колунов вӧзйис пуктыны ответственность квадробер челядь аймам понда. Шуам, босьтны аймамлісь правоэсӧ, лэдзны административнӧй либӧ уголовнӧй ответственность увтӧ. Депутатыс ыстіс ассис инициативасӧ Россияса президент дынся челядь праваэз дорйись уполномоченнӧйлӧн аппаратӧ[12].
2024 во аршӧрын Госдумаись депутаттэз группа кутчис лӧсьӧтны вежӧммез Административнӧй кодексӧ несовершеннолетньӧй представиттлез да 16 восянь квадроберрез понда. Йӧз да горт пода вылӧ уськӧтчӧм понда лӧсьӧтчӧны пуктыны хулиганство да сетны 5 сюрс руб штраф . Квадроберыс томжык кӧ 16 вося, сэк сылісь аймамыслӧ вермасӧ сетны содтӧт штраф 500 руб умӧль быдтӧм понда.[13].
Узбекистан МВД юӧр сьӧрті, челядь кӧ квадробер, сэк лыддьиссьӧ, мый аймамыс озӧ быдтӧ сійӧ. Сы понда пуктӧма штраф 1,875 миллион сум — 14 сюрс мымда руб[14].
Бизнеслӧн реакция
2024 во сьӧрна Россия пасьта квадроберрезлӧ вузалантор содіс 12-ись, Петербургын — 37-ись, Москваын — 45-ись. Маркетплейссэз вылын вузалӧны маскаэз, коккез, пеллез, бӧжжез, будкаэз да ольсӧттэз, велӧтчан курссэз, стилист удж[15][16]. 2024 во аршӧрӧ маркетплейссэз вылӧ петіс вердас морттэз понда, кӧдна занимайтчӧны квадробикаӧн. Сы пытшкӧсыс: сахар, пальмоядровӧй ви, ниртӧм какаӧ, косьтӧм рисьва, кӧс йӧв, кокосовӧй ви, экструдированнӧй шыдӧс (рис, шонді пизь, сахар, какао, сов)[17].
Фонтанка.ру газет лӧсьӧтіс квадроберрез понда вузаланторрез йылісь тодиль обзор. Меднебанаэзӧн лоисӧ аскерӧм ӧктӧттэз: бӧжжеслӧн даныс вӧлі 200 рубсянь 300 рубӧдз, сы паныт 1,5 метра керӧтӧм ку бӧжжес да пеллес понда вӧлі 6000-7000 руб. Парфюмеррез лӧсьӧтісӧ «быль квадроберлӧ» ароматтэз, а сідзжӧ ароматтэз, кӧдна вашӧтӧны квадроберресӧ (шуӧны, мый сыын груша, арбуз нето яблок дук). Вузавлісӧ тренируйтчӧм понда пластиковӧй барьеррез (900 - 4000 руб), профессиональнӧй модельеррезлісь керантор — нія вӧлісӧ готовӧсь керны костюм 20-30 сюрс руб донаӧн. Быдлунся вузаланторрез вузасиссез кутчисӧ вузавны: «тигр принта вельвет вешьян маркетинг вынӧн пӧрӧны квадробер понда вешьянӧ»[3].
Пасйӧттэз
- ↑ Квадроберы: кому на самом деле они подражают и почему этого не нужно бояться // Новости НТВ, НТВ (29 Одзгожум 2024). Дата обращения: 15 Гожумпом 2024.
- ↑ Лукашенко не выявил в Белоруссии проблем с квадроберами, РБК (23 Аршӧр 2024). Дата обращения: 24 Аршӧр 2024.
- ↑ 1 2 Барьеры, духи и корм для квадроберов. Как из скандального детского хобби пытаются делать бизнес, Фонтанка.ру (4 Аршӧр 2024). Дата обращения: 24 Аршӧр 2024.
- ↑ Квадробика: что это и как заниматься, опасность тренда, почему хотят запретить в России, Lenta.RU (5 Гожумшӧр 2024). Дата обращения: 15 Гожумпом 2024.
- ↑ Сходка квадроберов (ru-RU) (2024-04-20).
- ↑ Что такое квадробика: спорт это или нет, РБК Life (23 Тулыспом 2024). Дата обращения: 15 Гожумпом 2024.
- ↑ Скачки на деревянных лошадках стали видом спорта. Олимпиада ждет, sport-express.ru (9 Гожумпом 2023). Дата обращения: 15 Гожумпом 2024.
- ↑ «Я — рысь, моя подружка — пантера»: чем опасно новое помешательство подростков — они надевают маски и прыгают на четвереньках, НГС.ру (30 Тулыспом 2024). Дата обращения: 15 Гожумпом 2024.
- ↑ Териантропы: кто это, чем занимаются, как выглядят, отличия от фурри и квадроберов, Lenta.RU (12 Гожумшӧр 2024). Дата обращения: 15 Гожумпом 2024.
- ↑ 1 2 3 Как, почему и зачем квадроберы стали «политтехнологическим случаем», РБК (19 Аршӧр 2024). Дата обращения: 1 Арпом 2024.
- ↑ Mia Boyka осудила квадроберов и их родителей - Газета.Ru | Новости, Газета.Ru (2 Одзар 2024). Дата обращения: 1 Арпом 2024.
- ↑ Депутат Колунов предложил ввести ответственность для родителей детей-квадроберов (2024-10-03).
- ↑ "Приведут в чувство мам": названы будущие штрафы для квадроберов (2024-10-10).
- ↑ В Узбекистане пригрозили штрафами родителям квадроберов (2024-10-13).
- ↑ Квадроберы атакуют: дети в масках наводняют российские города, Росбалт (11 Аршӧр 2024). Дата обращения: 11 Аршӧр 2024.
- ↑ Спрос стал массовым: в России зафиксирован 50-кратный рост продаж товаров для квадроберов | RB.RU, rb.ru (11 Аршӧр 2024). Дата обращения: 11 Аршӧр 2024.
- ↑ На маркетплейсах появился корм для квадроберов (2024-10-03).