Дзуль (орсан)
Дзуль (дзуль-палка, шар-палка, шар-кляч) ― коми отирлӧн уна морта орсан.
Орсӧм
Атрибуттэз: дзуль ― пуись керӧм гӧглян, тув, 1-1,2 м кузя беддез орсіссез лыд сьӧрті.
Орсіссес бӧрйӧны волькытін. Сэтӧн керӧны квадрат, сы шӧрӧ дорӧны тув, кӧда вылӧ сувтӧтӧны дзульсӧ. Квадратсяняс ӧткодь ылынаын керӧны куим визь.
Орсан одзын бӧрйӧны «бабаӧс». Эта понда орсіссес сувтӧны квадрат дынӧ, да сысянь быдыс шентӧ бедь кокныр вылӧ сувтӧтӧмӧн. Кинлӧн бедьыс усяс медматӧ лоӧ «бабаӧн».
Одзлань пондӧтчӧ орсан. Орсанлӧн могыс бедьӧн инмӧтчыны да пӧрӧтны дзуль. «Баба» сувтӧ квадратыс дынӧ, бедьсӧ пуктӧ асдорас. Орсансӧ пондӧтӧ сія, кинлӧн бедьыс лэбзис медылынӧ.
Орсісь куимӧт, медсай визьсяняс аслас бедьӧн шентӧ да инмӧтчӧ дзуляс, кӧда сулалӧ квадрат шӧрас. Инмас кӧ дзуляс, котӧртӧ бедьыс сьӧрӧ, а «бабаыс» котӧртӧ дзульысла. Локтіс кӧ орсісьыс «бабаысся» чожжыка квадратыс дынӧ, вачкӧ бедьнас тулыс бердӧ, да орсӧ одзлань ― шентӧ бедьсӧ мӧд, шӧрись визьсяняс (мӧд визьсяняс бедьсӧ колӧ шентлыны кыкись; куимӧтыссянь, медматыныс дынсянь ― куимись).
Одзаліс кӧ локны «бабаыс» квадартыс дынӧ да пуктыны дзульсӧ тув вылас, орсісьыслӧн бедьыс кольччӧ квадрат саяс. Эта коста орсісьыслӧ колӧ ештыны пырны квадрат саяс.
Пондӧтчӧ орсны мӧдік орсісь куимӧт визь дынсянь. Если орсісьыс шентіс бедьсӧ и эз инмы дзуляс, «бабаыс» вермӧ шентны бедьсӧ ылӧжык. Эта понда сія должен тӧдны, мымда бедьӧддзас, например, шуӧ куим шаг. Тӧдіс кӧ, бедьсӧ шентӧ ылӧжык, эз кӧ ― кольӧ местаас.
Пондӧтчӧ орсны куимӧт орсісь. Бедьнас инмис кӧ дзуляс, сэк котӧртӧ бедьысла. Ӧтдруг котӧртӧны и нія, кинлӧн беддес квадрат саяс. Орсіссеслӧ колӧ босьтны ассиныс беддесӧ, ештыны пырны квадрат саяс «бабаысся» одзжык да вачкыны дорӧм тулас. Кин ештіс, вермӧ орсны вились, кин эз, бедьсӧ кольӧ квадрат саяс. «Бабаыс» котӧртӧ дзульысла да орсіссесся чожажык тэрмасьӧ пуктыны дзульсӧ аслас местаӧ.
Орсікас оз туй инмыны «бабаыс» бедьӧ. Инмин кӧ, лоин «бабаӧн».
Кольччин кӧ квадрат саяс, кӧр дзульыс местаас ни да «бабаыс» шуис «чур», то орсісьыс «сотчӧ».
Муніс кӧ орсісьыс быдӧс виззесӧ, сэк сія лоӧ «царьӧн». Сія вермӧ одзлань мӧддэсӧ мездыны. Кӧр мездӧ? Быдӧнныслӧн кӧ беддес лоисӧ квадрат сайын, то «царьыс» локтӧ дзульыс дынӧ да вачкӧ сы кузя. «Бабаыс» котӧртӧ дзульысла, орсіссес беддесла.
Лоисӧ кӧ быдӧнныслӧн беддес квадрат саяс, а мездыны «царьыс» абу, сэк орсіссес мунӧны асланыс беддес дынӧ и пондӧны нійӧ чапкавны, медбы пырны бӧр орсанас. «Бабаыс» эта понда пуктӧ ассис бедьсӧ дзульыс дынӧ (вермас ӧт помнас дзуль вылас). Орсісьыслӧ колӧ инмыны дзуляс нето бедяс, кӧднӧ «бабаыс» тэчас. Шентны колӧ сэтчинсянь, кытӧн бедьыс куйлӧ. Инман кӧ бедяс нето дзуляс, орсанас кольччан. Эз кӧ кинкӧ инмы, лоӧ «бабаӧн». Инмисӧ кӧ быдӧнныс, «бабаыс» кольччӧ сія жӧ.
Кӧр «бабаыс» куим орсан коста ӧтік, то сылӧ керӧны «наказаннё», пуктӧны му вылӧ быдӧс беддесӧ, ны вылӧ водтӧтӧны «бабасӧ» да тарлалӧны беддес вылӧт. Орсӧны сэтчӧдз, кытчӧдз оз мыдзӧ.[1]
Культураын
- «Дзуль» орсан сьӧрті шусьӧ Коми-Пермяцкӧй округын чулӧтан коми орсаннэз сьӧрті «Дзулимпиада» нима турнир.[2] «Дзуль» орсаныс сыын ӧтік дисциплина.[3] [4]
Пасйӧттэз
- ↑ Сиг, падей да горань: коми-пермяккезлöн орсаннэз (Сиг, падей и горань: игры коми-пермяков) / Авторы-составители: Н. А. Мальцева, Т. Н. Меркушева, Н. А. Пушкина. ‒ Кудымкар: ПРОО «Общество радетелей коми-пермяцкого языка и культуры «Югöр», 2021. ‒ 118 с. ‒ С. 54-59.
- ↑ Спортивно-просветительский турнир «Дзулимпиада». Культура РФ
- ↑ Шесть игр из нашего детства, в которые можно будет сыграть в День города. 09.07.2019. Парма-Новости
- ↑ Этнокультурный центр провёл фестиваль народных игр и забав "Дзулимпиада" в рамках фестиваля "Менам Парма - Россиялӧн тор". 14.06.2024. ГКБУК "Коми-Пермяцкий этнокультурный центр"