Губернатор керку (Перем)

Босьтöм Рувикиись
Керку
Губернатор керку
Губернатор керку 2021 вося ремонт бӧрын
Губернатор керку 2021 вося ремонт бӧрын
58°00′40″ с. ш. 56°14′54″ в. д.HGЯO
Канму Россия
Кар Перем
Медодззаись касьтылӧм 1790
Статус Россия йӧззэзлӧн культура эмбур объект федеральнӧй тӧдчӧта Россия йӧззэзлӧн культура эмбур объект федеральнӧй тӧдчӧта. Рег. № 591510305810006 (ЕГРОКН). Объект № 5910004000 (БД Викигида)
Логотип РУВИКИ.Медиа Медиафайлы на РУВИКИ.Медиа

Губернатор керку (рочӧн Дом губернатора) — Перемын иналана важся керку, сулалӧ Екатерининскӧй да Сибирскӧй улица туйвежын. 1995 восянь федеральнӧй тӧдчӧта культура эмбур объект. Сідзжӧ тӧдса кыдз Прянишниковлӧн керку[1].

История

[вильмӧтны | править код]

Керкуыс аслас историяись дыржык кадсӧ вӧлі пермскӧй губернаторрезлӧн оланінӧн да приёмнӧй. Татӧн овлісӧ роч гижиссез А. И. Герцен  (перм.рус. (1835) да В. Г. Короленко  (перм.рус. (1881), вовлісӧ А. Н. Радищев  (перм.рус. (1797), Е. А. Вердеревский  (перм.рус. (1848—1850), Н. Ф. Павлов  (перм.рус. (1853), Д. И. Менделеев  (перм.рус. (1899) да мӧдік гора нима отир[2][3].

XVIII сёво[вильмӧтны | править код]

Керкуыс одзжык вӧлі чиновник Иван Данилович Прянишниковлӧн, кӧда вӧлі локтӧм Петербургись да 1781 восянь уджалӧм Пермскӧй вылісь земскӧй судлӧн председательӧн. Медодз сія оліс семьянас дӧва Татьяна Кузнецова керкуын Кама дорын, а 1780—1790 воэзӧ аслас ыджыт семья понда сія лэбтіс усадьба — ӧтік сувда ыджыт керку Сибирскӧй да Екатерининскӧй улицаэз туйвежын (сы кадӧ сія вӧлі карлӧн дор[1]). Усадьбаас вӧлісӧ уна изовӧй да пуовӧй постройкаэз, сад да неыджыт парк. Керкуас вӧлі кык сувда зал, сы куим ӧшын петісӧ Сибирскӧй улица вылӧ, эта жӧ улицасянь вӧлі параднӧй пыранін. Екатерининскӧй улица пӧлӧн сулалан керкуджыныс петіс веськыта садӧ. Сія кадӧ сія вӧлі карас ӧтік медбур усадьба. 1793 воӧ эта керкуын чужис Прянишниковлӧн Фёдор зон[2].

Архитекторнас да лэбтісьнас вермис лоны медодзза губернскӧй архитекторрез коласісь ӧтік Г. Х. Паульсен  (перм.рус.[1].

XIX сёво[вильмӧтны | править код]

Губернатор керку Сибирскӧй улица ладорсянь тамбурӧн (1870—1887)

Прянишников Петербургӧ мунӧм бӧрын керкусӧ сылӧн Мария иньыс вузаліс откупщиклӧ, вольскӧй купец В. Злобинлӧ (купчӧйыс вӧлі кырымпасалӧм 1803 во тӧвшӧр 13 лунӧ). 1816 воӧ В. Злобин кулӧм бӧрын аркмис, мый сы сайын эм ыджыт одзӧс, да Прянишниковлісь керкуыс вӧлӧм пуктӧм залогӧ. Сійӧн 1817 воӧ керкуыс вӧлі вузалӧм публичнӧй аукционын одзӧс вештӧм понда, сійӧ небис коллежскӧй регистратор Иосиф (Осип) Фёдорович Арент аслас ныв понда — Евгения Иосифовна Барановалӧ, кӧдалӧн айкаыс вӧлі губернскӧй прокурорӧн[2].

Губернаторлӧн керку Екатерининскӧй улица ладорсянь. Веськытланись флигель 1908 годӧ лоас ӧтлаӧтӧм медшӧр керкукӧт (1887—1901)

1842 воӧ Перемыслӧн шӧрыс сотчис, сыын сотчис и Петропавловскӧй собор дынся губернаторлӧн пуовӧй керкуыс. Е. И. Барановалісь керкусӧ небис казна да вились лэбтіс губернатор понда резиденция. Керкуас вӧлі лӧсьӧтӧм губернаторлӧн приёмнӧй, а канцелярияыс сулаліс усадьба территория вылын, Сибирскӧй да Вознесенскӧй улицаэз пельӧсын (ӧні Луначарский нима улица) торйӧн сулалан пуовӧй флигельын. 1845 воӧ пермскӧй губернатор И. И. Огарёв овмӧтчис аслас виль резиденцияӧ[2].

1855 воӧ виль губернатор П. Н. Клушин тшӧктӧм сьӧрті керкуас вӧлі керӧм ремонт, сы дырни вӧлісӧ разьӧмӧсь карта ладорсянь кык капитальнӧй стена да лэбтӧм терраса. Сыбӧрся губернаторыс, К. И. Огарёв, лыддис керкусӧ кӧдзытӧн да тшӧктіс губернскӧй архитектор Г. П. Летучийлӧ лӧсьӧтны проект виль керку лэбтӧм понда мӧдіклаын, но локтан губернаторыс А. Г. Лашкарёв казна сьӧм экономия кузя тшӧктіс 1862 воӧ ремонтируйтны важ керкусӧ. 1865—1870 воэзӧ керкуас оліс губернатор Б. В. Струве, татӧн чужисӧ сы квать зонісь куим — Александр, Михаил да Пётр[2].

XX сёвоӧдз губернатор керку вӧлі прӧст синбана — ӧтік сувда керкуыс вӧлі фасадӧт классицизм сьӧрті керӧм синбана: веськыт пельӧса ӧшыннэс вӧлісӧ мичӧтӧмӧсь сандриккеза синпуэзӧн. Екатерининскӧй улица вылӧ петан фасад вылас веськыт сандриккез вежсьӧмась куим пельӧсаэзкӧт — ӧтӧрӧ видзӧтісӧ дасӧтік ӧшын. Керкуыс вӧлі вӧньӧтӧм «сухариккеза» помалан паськыт карнизӧн. Сибирскӧй улица вылӧ петан фасад вылын волькыт фриз помассис антресолись куим ӧшынӧн[2].

XX сёво[вильмӧтны | править код]

Губернатор керку (1908—1917)

1908 воӧ архитектор В. В. Попатенко проект сьӧрті керкуыслісь ӧтӧрся синбаныс вӧлі вежӧм. Медшӧр керку да Екатерининскӧй улица кузя флигель коласын керӧм кирпичнӧй помещеннё пыранінӧн да камина залӧн[4]. Разьӧм тамбур, кӧда петіс Сибирскӧй улица вылӧ, сы туйӧ керку лунвыв дор дынӧ улица пӧлӧн вӧлі лэбтӧм изісь пристройка, сыӧ вӧлі вуджӧтӧм медшӧр пыранін. Кык сувда залыс ыждӧтӧм, мый понда антресольын вӧлі писькӧтӧм нёльӧт ӧшын. Пристройка да керку фасаддэз вӧлісӧ мичӧтӧмӧсь эклектикаа декорӧн — нійӧ торйӧтӧмась аттиккезӧн помасяна ыджыт выступпэзӧн. Аттиккез да пельӧс тумбаэз коласӧ вӧлісӧ сувтӧтӧмӧсь писькӧтӧм аркаоккеза парапеттэз. Керку вевдӧрыс рустуйтӧм, ӧшыннэс мичӧтӧмӧсь рамаа синпуэзӧн[2].

1917—1918 воэзӧ керкуас вӧлі Перем карся рабочӧйезлӧн, крестьяналӧн да солдаттэзісь депутаттэзлӧн совет, сійӧн юраліс В. И. Решетников. Татӧн жӧ 1917 воӧ уджаліс «Пролетарское знамя» нима большевиккез газеталӧн редакция[2].

1920-ӧт воэзсянь 1980 воэзӧдз керкуас вӧлі Перем карся туберкулёзнӧй диспансер. 1978 воӧ ремонт коста вӧлісӧ разьӧмӧсь керкусӧ мичӧтан парапеттэз[2]. 1980-ӧт воэзӧ керкусӧ мӧдісӧ разьны сы аварийнӧй состояннё кузя, но отир петісӧ паныт. 1985—1986 воэзӧ керкуас мымдакӧ уджаліс Перем карся прокуратура, да 1988 во одзтулыс 22 лунӧ керкусӧ сувтӧтісӧ канмуся учёт вылӧ кыдз местася тӧдчӧта история да культура памятник[3].

П. Б. Струвелӧ сиӧм касьтылан пӧв

1995 воӧ президентлӧн указ сьӧрті керкыс вӧлі пыртӧм федеральнӧй тӧдчӧта история да культура эмбур объекттэз нимлёдзӧ «Губернатор керку» нимӧн[3].

XXI сёво[вильмӧтны | править код]

2020-ӧт воэз пондӧтчикӧ Перем карлӧн 300 вося юбилей кежӧ лӧсьӧтчӧм сьӧрті керкуыс вӧлі вильмӧтӧм — капитальнӧя ремонтируйтӧмӧсь фасад, вевт, цоколь, отмостоккез, шӧр пыранінісь посӧдз, сы киння вӧлі лӧсьӧтӧм парапет да керкуыслӧн историческӧй синбаныс (бӧрьяись керкусӧ ремонтируйтісӧ 1994 воӧ), керӧм архитектурнӧй югдӧт. Уджсӧ керисӧ Пермскӧй крайись культура эбмур объекттэз видзӧм сьӧрті канмуся инспекцияись да Пермскӧй администрацияись специалисттэз. Керкуас уджалӧ Перем карся администрациялӧн экономика да промышленнӧй политика департамент[3].

Керку вылас ӧшӧтӧмӧсь В. И. Решетниковлӧ да П. Б. Струвелӧ сиӧм мемориальнӧй пӧввез. Медбӧрьяыс сувтӧтӧм 1995 во тӧвшӧр 26 лунӧ сы чужан лунсянь 125 во тырӧм кежӧ — текстыс: «Эта керкуын 1870 во тӧвшӧр 26 лунӧ чужис Петр Бернгардович Струве, экономист, философ, Россияись либерально-демократическӧй движеннёлӧн тӧдчана деятель» (авторыс Н. Хромов)[4].

Пасйӧттэз

[вильмӧтны | править код]
  1. ↑ 1 2 3 Дом Прянишникова (дом губернатора) Памятники Перми Видзӧтан кад 2025-07-02
  2. ↑ 1 2 3 4 5 6 7 8 9 Рафиенко Л. С. Дом губернатора в Перми (ул. Сибирская, 27) // Пермский дом в истории и культуре края. Выпуск 2, Пермь, 2009. — С. 55—62.
  3. ↑ 1 2 3 4 Новости: В Перми отреставрировали знаменитый «губернаторский дом» - Муниципальное образование город Пермь (2021-11-08). Видзӧтан кад 2025-07-02
  4. ↑ 1 2 Дом губернатора Государственный архив Пермского края (2015-10-26) Видзӧтан кад 2025-07-02

Литература

[вильмӧтны | править код]
  • Спешилова Е. А. Старая Пермь: Дома. Улицы. Люди. 1723-1917. — Пермь: Курсив, 1999. — 580 с. — 5000 экз.

Ыстӧттэз

[вильмӧтны | править код]
Босьтӧма "https://koi.ruwiki.ru/w/index.php?title=Губернатор_керку_(Перем)&oldid=144451"-ись