Виль во кежся пызан

Босьтöм Рувикиись
Мандариннэз
Оливье
Виль во, графинын фрукттэз

Виль во кежся пызан — Виль во панталӧм атрибут, аскодя быд муын да регионын.

Виль во чулӧтӧмыс мунӧ асмоза волыддян, порйӧтан, паськӧм да сёян-юан сьӧрті[1]. Индуистскӧй, китайскӧй, коптскӧй, еврейскӧй, исламскӧй календаррез сьӧрті Виль воыс оз чулӧтсьы григорианскӧй календарь сьӧрті. Виль вося пызаныс быдлаын аскодя да уна сёяна. Сія вермас лоны ӧктӧм, традиционнӧй, ӧддьӧн тодиль кӧра сёяна, вегетарианскӧй да мӧдік; вермас лоны ӧктӧм сёянісь, кӧда лӧсьӧтӧм барбекю кеж, пиццаись, гӧссезӧн вайӧм сёянісь (потлак) да мӧдікись.

История

[вильмӧтны | править код]

Виль во кежся пызан историяыс йитӧм аскодя. XIX сёвоын Европаын пондісӧ керны салаттэз, кӧдна вачкисьӧны «шубаа селёдка» салат вылӧ. Чериыс вӧлі донтӧм, сійӧ вермисӧ небны крестяна да киподаліссез. Нія содтісӧ чериыс дынӧ карчйӧрын быдтӧм карч. Норвегияись селёдка салат йылісь вӧлі гижӧм 1845 вося английскӧй сёян-юан небӧгын. Германияын сы вылӧ вачкисяна салат керис мӧдік продукттэзісь да пуктісӧ пызан вылӧ соровтастӧг. Россияын этшшӧм салатыс лоис XIX сёво помын сія жӧ ингредиенттэзӧн: пуӧм картошка, чери, гӧрд кушман, морков[2].

Виль вося сёян-юан

[вильмӧтны | править код]

Традицияэз[вильмӧтны | править код]

Царскӧй Россияын вильвося пызанвылын медколана вӧлі пражитӧм порьспиян кыдз эмбурлӧн символ (ны киння, кин эз вермы небны нето начкыны), сідз кыдз лыддисис, мый оз туй сёйны кай, сыкӧт пӧ локтан воас вермас лэбзьыны шуд. Этаись дугдіссисӧ XIX сёво шӧрӧдз, кӧрсянь пызан вылӧ пондісӧ пуктыны яблоккеза дзодзог да вӧрпӧтка.

Советскӧй кадӧ вильвося пызан пырся атрибуттэзӧн лоисӧ шампанскӧй, винегрет, «оливье», «шубаа селёдка» салаттэз, тудӧм чери, студень[3] да мӧдікӧсь. Фрукттэзсис мантариннэз да яблоккез, ӧмчӧскӧт туйӧ вареннёэз да конфеткаэз. Керлісӧ быдберся сёян курӧг, чӧж, кролик, индейка, дзодзог яйись, сёянторрез (колбаса, сыр, гӧрд пӧк), да сідзжӧ порйӧтан торт. Мукӧд сёянсӧ виль во кежся пызан вылӧ пондісӧ керны католическӧй розосвося сёяннэзкӧт аналогия сьӧрті, католическӧй вежалунсӧ порйӧтан отирыс содӧм кузя. Мӧдіккес, шуам «шубаа селёдка», вӧлі аркмӧтӧм сёрӧнжык, 1970-ӧт воэз шӧрын[4].

Советскӧй кад бӧрын пондісӧ тэчны пызан вылӧ мӧдік яя сёяннэз — шуам, яй француззэз моз да мӧдік салаттэз, кӧдна мыччалӧны ӧння кадся магазиннэзісь уна сёянтор. Вильвося пызан вылӧ пуктӧны алкогольнӧй, газа да газтӧм юаннэз, фрукттэз, да сідзжӧ быдберся чӧскыттор. Унаӧн керӧны студень да гортся пельняннез.

Россияын йӧззэз[вильмӧтны | править код]

Тюроккез да Кавказісь йӧз порйӧтӧны кык календарнӧй вежалун да кыкись ӧктӧны порйӧтан пызан: Виль во кеж и Навруз кеж — одзтулыс помын, порйӧтӧны увтырӧн. Пызан вылын коланаӧсь бешбармак, дзель яйись сук шыд, чечевицаись табаннез, губадия, урама, чак-чак да мӧдік сёянторрез.

Буряттэз, тыва отир, калмыккез сідзжӧ кыкись ӧктӧны виль во порйӧтан пызан: тӧвшӧр 1 лун да тӧвпомын — Цаган Сар (Сагаан Сар, комиӧн Чочком Тӧлісь) вежалун кеж. Сы кеж керӧны традиционнӧй «борцоки» нима няньторрез (нійӧ керӧны берся вӧрпаэз да поредня формаэзаа — йи, сермӧт).

Ненеч отирлӧн сідзжӧ кык виль во — тӧвся (арпомын) да гожумся (одзгожумын). Ысыах (Виль во) Сахаын порйӧтӧны кык-куим лун сьӧрна, ӧзтӧны ыджыт бипуррез, лӧсьӧтӧны уна яйсёян, чери, ӧмчӧскӧт, ӧксьӧны ыджыт йӧктанкытшӧ, сьылӧны да йӧктӧны[5].

Карелияын Сюндума луннэз кеж лӧьӧтӧны шыдӧса рок, зӧрпизь табаннэз, чӧскыт пирӧггез.

Эвенккез чулӧтӧны Мучун (му вильмӧтан кад), нганасаннэз порйӧтӧны тӧвой помалӧм — тӧвшӧр медбӧрья луннэзӧ, тӧвпом одз; ненеч вежалун — шонді панталӧм; энеццез (200-ся невна унажык морт) озӧ порйӧтӧ Виль во, одзтулыс помын нія чулӧтӧны «Ко позу» («Кыдз гижӧм») нима вежалун, быдыслӧ сетӧны кӧр яй. Виль во кеж лӧсьӧтісӧ ритульнӧй сёян сэвэн — пуӧм да масьтӧм кӧр нето ош яй ошгос сорӧн (2 панься етшажык), кын черияй, чериись керӧм сёян, пӧкья табаннез, берся ягӧда кын йӧв[6].

Эвенккез, кӧдна олӧны Колыма ю дорын (Магаданскӧй область) порйӧтӧны виль — Хэбденек (гажӧтчӧм), гожумся кузьлун коста.

Долганнэз порйӧтӧны Хейро — тӧвой бӧрся шонді петӧмлӧ кӧсйӧм вежалун, сія пондӧтчӧ асъяпонӧн, асывнас 5 час.

Поморрез важ кадсянь порйӧтісӧ Новолетие, кӧда чулӧтсьывліс одзар 14 лунӧ важ стиль сьӧрті[7]. Одзарӧн сідзжӧ чулӧтсьывліс Маргаритинскӧй ярмарка[8], кӧдӧ вились пондісӧ чулӧтлыны 2001 одзарсянь[9]. Ӧння кадӧ Кардорын одзар 14 лунӧ сідзжӧ чулӧтсьӧ арся вежалун — гожум кольлалӧм да Новолетиеыс, вежалуныс шусьӧ Помор Виль во[10][11][12]. Виль во кежас поморрес пожавлісӧ традиционнӧй пӧжас, сы йылісь тӧдса XVIII сёво одзсянь[13], — глазурьӧн мичӧтӧм ляпкыт прениккез — «кӧзуллез» (рочӧн козули, мӧдік роч кывья ниммес «рогушки», «коровки», «козульки», «баранки»). Нимыс йитӧм ны формаӧн — нійӧ унажыксӧ пожалісӧ сюра пода формааӧсь (инька, гӧгрӧс, кӧдзув, идӧг, кайез), нія вӧлісӧ йылӧм символӧн: кыным унажык преникыс, сыным буржыка подаыс йылас. Традициясӧ видзисӧ быд гортын, 1960-ӧт воэзӧ нія вились паськтыта петісӧ кыдз архангельскӧй преник. Соломбалаись К. И. Карамзина керӧм прениккесӧ мыччалісӧ Государственнӧй историческӧй музейын (1960—1970-ӧт воэзын), «Русский пряник» нима художествоа открыткаэз серияын (1971 во). Ӧння кадӧ Кардорын чулӧтсьӧ быдвося «Чудо северного пряника» нима выставка[14].

Кӧзуллез (рочӧн пряники-козули)

Порйӧтан пызан вылӧ поморрес тэчлісӧ треска чери быдкодь содтӧтӧн (волож) — йӧла, нӧкья да виа, да сідзжӧ чочкомсаридзся мидияэз, вива шаньгаэз, чериняннез, лязгай (кёж)[15]. Пуисӧ Пертомаись черива [16], прениккез киння пӧжалісӧ шаньгаэз, быдкодь парӧга пӧжассэз, колоббез да «калиткаэз»[17].

СССР дырйи ойвывся йӧззэз пондісӧ порйӧтлыны советскӧй донтан луннэз. Виль во коста дзик дӧс ойвывся йӧззэз ӧктӧны порйӧтан пызан да тэчӧны национальнӧй сёян, да содтӧны ны дынӧ оливье да торт[18].

Статистика[вильмӧтны | править код]

Виль во кеж пызан понда сьӧмлісь ыжда туялӧ Росстат[19][20], а сідзжӧ Российскӧй Федерация мукӧд регионнэзісь статслужбаэз[21].

Росстатыс пыртӧ вильвося менюӧ сэтшӧм продукттэзлісь дон: коптитӧм уль яйись колбаса, коптитӧм яй, чери, пӧк, курӧг яй, мӧс яй, ви, сыр, шоколаднӧй конфеткаэз, апельсиннэз, лимоннэз, бананнэз, карч, торттэз, коньяк, вина, соккез да газируйтӧм ва. Сія сідзжӧ лыддьӧ донсӧ регионнэзӧт: меддонаыс традиционнӧя лоӧ виль во кежся пызан Чукотскӧй автономнӧй округын, Ненецкӧй автономнӧй округын, Камчатскӧй крайын да Ямал-Ненецкӧй автономнӧй округын, меддонтӧмыс Калмыкияын, Калининградскӧй, Липецкӧй, Белгородскӧй да Омскӧй областтезын[22][23].

Удмуртстат традиционнӧя лыддьӧ куим вариант: прӧст, традиционнӧй да тыр[24].

  • «Прӧст ӧктӧтӧ» (малоимущӧй семья понда) пырӧ продукттэз минимум: сола селёдка, винегрет понда карч, апельсиннэз 1 кг да 1 бутылка водка.
  • «Традиционнӧй ӧктӧт» (сідз шуана шӧрӧт классісь семья понда): пельняннез, оливье да винегрет, коптитӧм колбаса, сыр, сок, шоколаднӧй конфеткаэз, торт, фрукттэз 2 вид да 2 вид алкогольнӧй юан.
  • «Тыр ӧктӧтӧ» (эмбура семья понда) пырӧ быдсӧн «традиционнӧй ӧктӧт» да яй да чери деликатэссэз, лосось пӧк, коптитӧм уль яйись колбаса, карч, ӧреккез, мороженӧй, 3 вида фрукттэз да алкогольнӧй юан[25]. Россияын да СНГ канмуэзын кыдз вильвося пызан символ тэчсьӧны оливье да мандариннэз[22]. 1970-ӧт воэз шӧрсянь сы пырис шубаа селёдка[26].

2000-ӧт воэзӧ аркмис «оливье индекс», кӧда ӧкьсӧ салатӧ пуктӧм продукттэз донӧт. Меддона оливьеыс кольччӧ Чукоткаын, Ханты-Мансийскӧй автономнӧй округын доныс чинӧм, 2021 воын меддонтӧмыс вӧлі Белгородскӧй областьын[27].

2023 во помын «Руспродсоюз» ассоциация лыддис, мый нёльморта семья понда порйӧтан сёяныс лоас 5,5 сюрс руб мымда[28].

2024 воӧ нёль морт понда продукттэз ӧктӧтлӧн шӧрӧт доныс лоис 9,1 сюрс руб мымда. Единӧй межведомственнӧй информационно-статистическӧй система (ЕМИСС) даннӧйез сьӧрті, доныс содіс мӧймуся донся 13,5%-ӧн[29].

Европа[вильмӧтны | править код]

Данияын вильвося традиционнӧй сёянӧн лыддиссьӧны фасоль да анькытш, кӧда символизируйтӧны вын да етш, да сідзжӧ яблоккез — сьӧлӧмтӧм да мич символ.

Францияын порйӧтан пызан вылӧ тэчӧны трюфеллез, индейка да фуа-гра, а сідзжӧ уна мӧдік сёян, ӧмчӧскӧт туйӧ — чӧскытторрез да сыр[30].

Албанияын гӧститӧтӧны кытш формаа пирӧгӧн да сотӧны пес.

Польшаын Виль восӧ панталӧны шӧмашыдӧн нето тшакьяшыдӧн, кашаӧн да чериӧн[31].

Чехияын традиционнӧй сёяннас лоӧны шыдӧс да перловка, а сідзжӧ яблоккезісь штрудель[31].

Сербияын вильвося пызан вылын медколанаыс порсьпиян[31].

Порсь яйись колбаса чечевицаӧн.

Италияын лӧсьӧтӧны чечевица (сія символизируйтӧ эмбура олӧм) порсь колбасаӧн, лазанья, чери да саридзись сёянторрез[32].

Испанияын традиционнӧй вильвося сёянӧн лыддиссьӧны саридзись сёянторрез, хамон, сыррез, рисісь керӧм пудинг, быдкодь пӧжассэз[33].

Грецияын порйӧтан пызан вылын медколана нянь серреза ягӧд да ӧрек парӧга Василопита нима пирӧг [34].

Ыджыт Британияын традиционнӧй сёняыс: парӧга индейка карчӧн да ӧмчӧскӧт туйӧ пудинг [35].

Швецияын озӧ лӧсьӧтӧ Виль во кеж пызан, Виль восӧ панталӧны ӧтӧрын[36].

Виль вося пызан вылын пӧжассэз.

Африка[вильмӧтны | править код]

ЮАР-ись басуто отир порйӧтӧны виль восӧ гожумпомын, менюӧ пырӧ тинг нима каша, кӧда керӧм масьтӧм сорго, проса да кукурузаись. Чулӧтан луннэзӧ керӧны пороз бӧжжезісь шыд, пражитӧм яй (браай) да пуӧны курӧг яй, быдӧс этӧ сёйӧны лук, чеснӧг, гӧрд гормӧг да помидоррезісь керӧм соусӧн. Шогдіись керӧны йогурт вылӧ вачкисяна сёян. Лекебекоане — кукуруза пизись керӧм табаннез. Мангаджане — кӧс карч, пуктіссьӧ секокомогане содтӧтӧн (масьтӧм марула, тӧдса кыдз бурдӧтчан быдмас). Карч, тинг, яй да саридзись сёянторрезӧ содтӧны специяэз да ароматизаторрез. Юӧны соргоись нето имбирись керӧм кодззӧтан юанӧн. Керкуэз вылӧ кышӧтӧны дӧрапассэз, кӧднӧн мыччалӧны, кытшӧм сёян эм: чочком — юан, каша да пӧжас, виж — унажыксӧ карч, гӧрд — менюас эм яй[37].

Азияись муэз[вильмӧтны | править код]

Китайын Виль во кежӧ лӧсьӧтӧны курӧг, чери да сояись рись. Ойвылын сёйӧны пельняннез, лунвылын — «няньгао» (ляма рисісь торрез)[38].

Японияын вильвося пызан вылӧ пуктӧны кузь лапша, саридз капуста, бобиэз, пуӧм чери, а сідзжӧ моти— традиционнӧй табаннез, кӧдна кермӧмӧсь масьтӧм рисісь, нійӧ пуӧны нето пражитӧны гриль вылын[31].

Шри-Ланкаын порйӧтан пызан вылӧ пыр пуктӧны кирибат — национальнӧй сёян, кӧдалӧн эм религиознӧй вежӧртас: сійӧ сёйӧны тодиль вежалуннэзӧ, чужан луннэзӧ, Виль во одзын да регилигиознӧй вежалуннэз коста.

Виль во кежся пызан Вьетнамын.

Вьетнамын порйӧтан сёянсӧ керӧны рисісь да яйись.

Непалын Виль восӧ порйӧтӧны тулысшӧрын — Бискет Джатра вежалунӧ. Пызан вылӧ пуктӧны индийскӧй да тибетскӧй сёян-юан[35].

Индия

Индияын Виль во одзын порйӧтӧны «Бису кани» (англ. bisu kani) — важся вежалун, кӧда символизируйтӧ му чужӧм. Тулу кывья отир ӧксьӧны ӧтлаӧ да порйӧтӧны Виль во пондӧтчӧм. Мукӧд регионнэзын — Дакшина-Каннада Мангалурын, Касарагодын, да сідзжӧ Керала да Тамилнад штаттэзын сія виль во пондӧтчӧм порйӧтӧм[39]. Сія чулӧтсьӧ шонді календарь сьӧрті, одзтулысӧн нето тулысшӧрӧн и мыччалӧ Мам-вӧрва донтӧм. Фрукттэз да карч — тырдоз символ — видзӧны тодиль местаын да кеймӧны нылӧ. Вильвося пызан вылӧ пуктӧны карч да фрукттэз: баклажаннэз, огуреццез, тыкваэз, грейпфруттэз, бананнэз, ӧреккез, ны коласын ареканут (англ. areca nut), кокоссэз, джамбу воӧм, манго, гарцинияэз, хеббаласа, джекфрут да мӧдікӧсь, пуӧны чечевицаись самбар (самбхар) шыд, керӧны бананісь чӧскыт табаннез (англ. Banana Podi). Сія лунӧ томмесӧ буркывтӧны пӧриссес[40].

Хмонггез

Хмонг отирлӧн (медунаа отир Лаосын, олӧны сідзжӧ Китайын, Вьетнамын да Таиландын) Виль воыс чулӧтсьӧ 12-ӧт тӧлісь тыр тӧлісьӧ, кӧда мыччалӧ Виль во пондӧтчӧм тӧлісся календарь сьӧрті да шусьӧ «куимдаслӧн вежалун» (Ца Хаув Той). Сія Виль волӧн пондӧтчӧм, кӧда коста хмонггес козьнасьӧны да буркывтӧны виль олӧм кад[41][42]. Вежалуныс абу йитӧм тӧлісся календарькӧт, сідз кыдз чулӧтсьӧ карч дзимлявтӧн арпомын нето одзтӧлӧн. Порйӧтаныс кыссьӧ 30 лун сьӧрна. Мукӧд канмуэзын, шуам, США-ын джендӧтӧм куим лунӧдз[43]. Сы коста рочасьӧны да ӧксьывлӧны порйӧтӧм кеж. Быд порйӧтан лунӧ пызан вылас колӧны дас берся сёян. Традиционнӧйезӧн лыддиссьӧны бан чунг (англ. ban chung) — рис, порсь яй да дзор бобиэз, пӧжӧмӧсь банан корын[44], рисісь табаннез тростник сиропӧн, пражитӧм бананторрез[45]. Пызан вылас уна яй сёян: вежалуныс кежӧ начкӧны порсь. Быд гӧсьлӧ сетӧны пуӧм кольть да кольтись керӧм рулетоккез. Пызан вылӧ сідзжӧ пуктӧны чери, пуӧм банан кор ру весьтын, салапао (карч да кольть парӧга пӧжас), лаап (чери туруннэзӧн да рисӧн), лапшаа курӧгшыд да пражитӧм гриль вылын яй[46].

США[вильмӧтны | править код]

Виль во кежся пызан США-ын.

США-ын вильвося сёянӧн лыддиссьӧ парӧга индейка[31].

Австралия[вильмӧтны | править код]

Австралияын абу тодиль вильвося сёян. Сэтчин керӧны барбекю, стейккез да грильвывся сосискаэз[34].

Культураын

[вильмӧтны | править код]

Виль во порйӧтан сёян мыччасьӧ киноын, телевиденнёын да масс-культураын. «Кытшӧм сэрп эта тіян тудӧм чери!» шуӧм «Олан ирония, нето Кокнит руӧн!» фильмись пырис отир ӧмӧ[47].

Владимир Гиляровский «Москва да москвиччез» небӧгись «Труба вылын» торын гижис: «Лыддиссис ӧддьӧн шикӧн, кӧр павжунсӧ керис повар-француз Оливье, кӧда лоис тӧдсаӧн сы керӧм оливье салат кузя, кӧдатӧн павжун абу павжун да кӧдалісь керӧмсӧ эз осьтлы»[48].

Галерея

[вильмӧтны | править код]
  • Италия. Виль во

    Италия. Виль во

  • Виль во кежся пызан Японияын

    Виль во кежся пызан Японияын

  • Гӧрд пӧкья нянь

    Гӧрд пӧкья нянь

  • Виль во кежся пызан, Россия, 2012 во

    Виль во кежся пызан, Россия, 2012 во

  • Виль во, фужеррез шампанскӧйӧн

    Виль во, фужеррез шампанскӧйӧн

Пасйӧттэз

[вильмӧтны | править код]
  1. ↑ New Year's traditions: How do people celebrate the new year around the world? (англ.). bbc.co.uk. Дата обращения: 23 ноября 2022.
  2. ↑ Селедка под шубой: история праздничного салата. www.culture.ru. Дата обращения: 29 ноября 2022.
  3. ↑ Сколько можно хранить блюда с новогоднего стола? 2x2.su. Дата обращения: 29 ноября 2022.
  4. ↑ История и рецепт знаменитого салата. ntv.ru. Дата обращения: 29 ноября 2022.
  5. ↑ Таймыр: Новый год у коренных народов Севера. dudinka.city.online. Дата обращения: 29 ноября 2022.
  6. ↑ Старцев А. Ф. Традиционная культура и питание дальневосточных эвенков в прошлом и настоящем // Россия и АТР : Научный журнал. — 2010. — № 1. — С. 60—69. — ISSN 1026-8804.
  7. ↑ Новогодние традиции народов России: поморы. Звезда Алтая. Дата обращения: 1 декабря 2022.
  8. ↑ Архангелогородская (Воздвиженская, Маргаритинская ярмарка), также Маргаритинская ярмарка, первую международная российская ярмарка. Администрация ГО "Город Архангельск". Дата обращения: 1 декабря 2022.
  9. ↑ Анатолий Беднов. Маркиз и Маргарита, или Как военный губернатор ярмарке имя дал. pastar.ru. Дата обращения: 1 декабря 2022.
  10. ↑ Маргаритинская ярмарка. Управление развития туризма министерства культуры Архангельской области. Дата обращения: 1 декабря 2022.
  11. ↑ Маргаритинская ярмарка. Архангельская областная научная библиотека им. Н. А. Добролюбова. Дата обращения: 1 декабря 2022.
  12. ↑ Анатолий Беднов Архангельский общественник: Поморский Новый год объединяет людей рус.. Видзӧтӧм 1 Одзтӧв 2022.
  13. ↑ Ирина Скалина Зима в Архангельске пахнет пряниками рус.. Видзӧтӧм 1 Одзтӧв 2022.
  14. ↑ Н. Филева. Архангельские козули. — Архангельский государственный музей деревянного зодчества. — Архангельск: Издательский центр АГМА, 1999. — P. [16—23] (col. 26). — (Народные ремесла русского Севера).
  15. ↑ Игорь Соколов. Парадоксы поморского питания. Кириллица. Дата обращения: 29 ноября 2022.
  16. ↑ Татьяна Буторина Суровые русские викинги, рыболовы, первые путешественники – кто такие поморы рус.. Видзӧтӧм 1 Одзтӧв 2022.
  17. ↑ Людмила Черёмухина Старинный поморский Новый год рус.. Видзӧтӧм 1 Одзтӧв 2022.
  18. ↑ Алексей Черенков, Полина Петренко, Алена Скользина. Дед Мороз к ним не придет. Дата обращения: 29 ноября 2022.
  19. ↑ В Росстате оценили стоимость новогоднего оливье. lenta.ru. Дата обращения: 29 ноября 2022.
  20. ↑ Росстат: Новогодний стол россиян подорожает почти на 8 %. www.mn.ru. Дата обращения: 29 ноября 2022.
  21. ↑ Воронеж оказался на 16-м месте в рейтинге стоимости салата «Оливье». moe-online.ru. Дата обращения: 29 ноября 2022.
  22. ↑ 1 2 Росстат узнал, где новогодний стол дешевле. ppt.ru. Дата обращения: 29 ноября 2022.
  23. ↑ Росстат узнал, где новогодний стол дешевле. www.eg-online.ru. Дата обращения: 29 ноября 2022.
  24. ↑ Новогодний стол обойдется семье из Удмуртии в среднем в 1634 рубля. izhlife.ru. Дата обращения: 29 ноября 2022.
  25. ↑ Росстат оценил стоимость новогоднего стола. mn.ru. Дата обращения: 29 ноября 2022.
  26. ↑ Классический рецепт салата "Сельдь под шубой". ria.ru. Дата обращения: 29 ноября 2022.
  27. ↑ Индекс оливье. ТАСС. Дата обращения: 30 ноября 2022.
  28. ↑ Стоимость новогоднего стола за год выросла на 9% - Российская газета, Российская газета (20 Арпом 2023). Дата обращения: 13 Арпом 2024.
  29. ↑ Cредняя стоимость продуктов для новогоднего стола составила 9,1 тыс. рублей, AiF. Дата обращения: 1 Одзтӧв 2024.
  30. ↑ Les traditions du réveillon du Nouvel An en France (фр.). Ambassade de France à Copenhague. Дата обращения: 23 ноября 2018. Архивировано 25 ноября 2018 года.
  31. ↑ 1 2 3 4 5 Праздник с любимым вкусом Какими блюдами встречают Новый год в разных странах мира, Lenta.RU (13 Арпом 2024). Дата обращения: 13 Арпом 2024.
  32. ↑ Новогодние рецепты. Что едят в Европе, чтобы разбогатеть, РИА Новости (25 Одзтӧв 2020). Дата обращения: 13 Арпом 2024.
  33. ↑ Новый год в Испании: традиции, меню, подарки, Коммерсантъ (15 Одзтӧв 2021). Дата обращения: 13 Арпом 2024.
  34. ↑ 1 2 Дарья Тарасенко. Съесть 12 виноградин в красном белье: как отмечают Новый год в разных странах, Вокруг света. Дата обращения: 13 Арпом 2024.
  35. ↑ 1 2 Ирина Бадешко 13 традиционных блюд, которые обязательно появятся на столах разных стран мира Источник: https://travelask.ru/blog/posts/5183-13-traditsionnyh-blyud-kotorye-obyazatelno-poyavyatsya-na-st.
  36. ↑ Интересные новогодние традиции разных стран и народов мира. 7dach.ru. Дата обращения: 29 ноября 2022.
  37. ↑ John Jacobs Lesotho Recipes Perfectly Blend A Variety Of Ethnic Traditions англ.. Видзӧтӧм 30 Арпом 2022.
  38. ↑ Китайский Новый год, РИА Новости (10 Тӧвпом 2024). Дата обращения: 13 Арпом 2024.
  39. ↑ Karavali Samskruthika Chavadi To Host ‘Bisu Parbha’ In City On Apr.14 (англ.). Star of Mysore. Дата обращения: 29 ноября 2022.
  40. ↑ Raviprasad Kamila. Bisu kani brings people together at Pilikula Nisargadhama (англ.). The Hindu. Дата обращения: 29 ноября 2022.
  41. ↑ Cyril Eberle Hmong New Year (англ.). maptia.com. Дата обращения: 29 ноября 2022.
  42. ↑ Phyllis Louise Harris. Hmong New Year: A celebration of harvest, romance and food! (англ.). Twin Cities Enterprise. Дата обращения: 23 ноября 2022.
  43. ↑ The Hmong New Year (англ.). hmonglessons.com. Дата обращения: 29 ноября 2022.
  44. ↑ Banh Chung for Lunar New Year Recipe (англ.). www.seriouseats.com. Дата обращения: 29 ноября 2022
  45. ↑ Thy Tran. Hmong New Year Festival (англ.). KQED Inc. Дата обращения: 23 ноября 2022.
  46. ↑ Hmong New year in Laos (англ.). MEKONG CRUISES. Дата обращения: 23 ноября 2022.
  47. ↑ Готовим заливную рыбу на Новый год. www.foodestet.ru. Дата обращения: 29 ноября 2022.
  48. ↑ Ксения Карпова. Девять интересных фактов об оливье. teleprogramma.pro. Дата обращения: 30 ноября 2022.

Лыддьӧтан

[вильмӧтны | править код]
Босьтӧма "https://koi.ruwiki.ru/w/index.php?title=Виль_во_кежся_пызан&oldid=107837"-ись