Вилесов Георгий Иванович

РУВИКИ-ын эмӧсь статьяэз мӧдік морттэз йылісь гижсянӧн Вилесов.

Вилесов Георгий Иванович
Чужан лун	1902 во одзтулыс 15 лун(1902-03-15)
Чужанін	Юсьва, Соликамскӧй уезд[d], Пермскӧй губерния[d], Российскӧй империя[d]
Кулан лун	1979 во одзтулыс 5 лун(1979-03-05) (76 лет)
Куланін	Екатеринбург, РСФСР[d], СССР[d]
Канму	Российскӧй империя[d]  СССР[d]
Уджаланін	Урался горнӧй канмуся университет[d]
Велӧтчанін	Урался горнӧй канмуся университет[d]
Учёнӧй тшупӧт	техника тӧдӧмын доктор
Учёнӧй званнё	профессор
Донтан пассэз да премияэз

Вилесов Георгий Иванович (1902 во одзтулыс 15 лун, Юсьва, Соликамскӧй уезд^[d], Пермскӧй губерния^[d], Российскӧй империя^[d] — 1979 во одзтулыс 5 лун, Екатеринбург, РСФСР^[d], СССР^[d]) — советскӧй горнӧй инженер, маркшейдер удж туялісь, техника тӧдӧмын доктор (1962), профессор (1963). Велӧтісь удж сьӧрна лӧсьӧтіс 15 тӧдӧм кандидат, 85 туялан уджлӧн автор. «Методика геометризации месторождений» нима мнографиялӧн медшӧр соавтор (1973) да куим велӧтан небӧглӧн автор.

Олантуй

Чужис 1902 во одзтулыс 15 лунӧ Пермскӧй губернияись Юсьва посадын уна кагаа семьяын.

1914—1919 воэзӧ велӧтчис Оханскӧй реальнӧй училищеын, сэсся уджаліс счетоводӧн Екатеринбургын да горт посадас (1919—1921). 1924 воӧ, Урался топография техникум помалӧм бӧрын, 1926 вося тулыспомӧдз уджаліс топография снимайтӧмын Ойвыв Уралын.

1926 вося гожумпомсянь 1931 вося тӧвшӧрӧдз велӧтчис Урался горнӧй институтын, кытӧн ӧткоста уджаліс профессоррез П. К. Соболевский да Ф. Ф. Павлов кафедраэзын, юраліс геодезическӧй практикаэзӧн. Институтсӧ «Маркшейдер удж» специальность сьӧрті помалӧм бӧрын вӧлі кольӧм велӧтісь удж понда.

Великӧй Отечественнӧй войнаын участник. 1941—1943 воэзӧ кысъяліс Монголияын, 17-ӧт армия штаблісь тодиль удж керӧмӧн. 1947 воӧ Вилесовыслӧ вӧлі сетӧм «I ранга горнӧй директор» асторья званнё.

Куліс 1979 во одзтулыс 5 лунӧ Свердловскын, дзебӧм Широкореченскӧй шойнаын. Сёрӧнжык ордччӧн вӧлі дзебӧм сы инь — Вилесова Елизавета Николаевна (1910—1994).

Туялан да велӧтан удж

1939 воӧ дорйис кандидат диссертация (темаыс рочӧн «Геометризация месторождений благородных металлов»), да 1962 воӧ дорйис доктор диссертация (темаыс рочӧн «Геометризация уральских месторождений золота»). Медшӧр уджжес гижӧмӧсь руда куйланіннэз форма вежласьӧм да ныын колана компоненттэзлісь иналӧмсӧ туялӧм йылісь, Уралын кӧрт руда, никель да мӧдік куйланіннэзлӧн пытшкӧс сьӧрті петкӧтлассэз прогнозируйтан методдэз йылісь.

Урался горнӧй институтын (ӧні — Урался горнӧй канмуся университет) уджаліс:

• ассистент (1931—1939);
• доцент (1939—1963);
• маркшейдер удж кафедраӧн юралісь (1944—1975);
• шахтастроитан (1950—1954) да горнӧй (1957—1963) факультеттэзлӧн декан.

Велӧтан удж сьӧрна лӧсьӧтіс 15 тӧдӧм кандидат, публикуйтіс 85 туялан удж. Вӧлі СССР-лӧн изшом промышленность министерстволӧн туялан-техническӧй советӧ да горнӧй геомеханика да маркшейдерскӧй удж Дӧссоюзся туялан институтлӧн техническӧй советӧ пырисьӧн.

Донтан пассэз

• «Почёта пас» орден (1951);
• «Уджын доблесть понда» медаль;
• «1941—1945 воэзся Великӧй Отечественнӧй войнаын Германия вермӧм понда» медаль;
• «1941—1945 воэзся Великӧй Отечественнӧй война коста бура уджалӧм понда» медаль.

Библиография

• Филатов В. В. Вилесов Георгий Иванович // Профессора Уральского государственного горного университета: биогр. справ. — Екатеринбург, 2009.
• Вилесов Георгий Иванович (1902—1979) // Свердловский хронограф—2007. — Екатеринбург, 2006.

Пасйӧттэз

Ыстӧттэз

• Вилесов Георгий Иванович — «Геологи Урала» сайт