Назукин Иван Андреевич
| Назукин Иван Андреевич | |
|---|---|
 | |
| Чужан лун: | 1892 во тӧвшӧр 18 лун |
| Чужанін: | Титкова, Пожва волость, Пермскӧй губерния, Российскӧй империя |
| Кулан лун: | 1920 во тӧвпом 24 лун |
| Куланін: | Крымскӧй ССР |
| Канму | |
| Удж | революционер, дорсись, подводник |
 Медиафайлы на РУВИКИ.Медиа | |
.svg){kind=small}
Назукин Иван Андреевич (1892 во тӧвшӧр 18 лун, Титкова, Соликамскӧй уезд, Пермскӧй губерния, Российскӧй империя —1920 во тӧвпом 24 лун, Крым) — революционер, Гражданскӧй война костся Крымын большевиккезлӧн подпольеӧн юралісь, Крымскӧй ССР просвещеннё нарком. Вийӧм «чочкоммезӧн»[1][2].
Олантуй
Чужис 1892 во тӧвшӧр 18 лунӧ (важмоза тӧвшӧр 6 лунӧ) Пожва дынся Титковаын заводскӧй крестьяна семьяын. Помаліс Пожваись кыккласса училище. Тӧмкадсянь уджаліс Пожва кӧрткерӧтан заводын дорсисьӧн.
Российскӧй императорской флотын
Вӧлі босьтӧм РИ армияӧ, кысъяліс флотын Кронштадтын матросӧн. 1913 воӧ вӧлі вуджӧтӧм Балтийскӧй флотісь Сьӧдсаридзся флот вылӧ, велӧтчис подводнӧй флот понда рулевӧйезӧс лӧсьӧтан школаын. Кысъяліс «Судак» нима субмарина экипажын, кӧда базируйтчис Балаклаваын[3].
Революционнӧй органнэзын
Балаклаваын советскӧй власть сувтӧтӧм бӧрын 1917 во одзтӧв 18 лунсянь юраліс Балаклаваись революционнӧй комитетӧн, 1918 во тӧвшӧрсянь — РСДРП(б) комитетӧн, сыбӧрын Балаклаваись военнӧй, рабочӧй да крестьянскӧй депутаттэз Советӧн.
Сьӧкыта шогаліс, 1918 во гожум-арнас бурдӧтсьӧм могись вовліс гортас. Лоис Пожва волостнӧй исполком членӧн. Отсаліс национализируйтны князь С. Е. Львовлісь заводдэз, организуйтіс Гӧрд гвардиялісь отряд. Усольскӧй уездсянь вӧлі бӧрйӧм депутатӧн 1918 во арпом 6-9 луннэзся Советтэзлӧн VI Всероссийскӧй съезд вылӧ. Пырис РСФСР ВЦИК составӧ[1].
1918 во тулысӧн Балаклаваыс вӧлі оккупируйтӧм кайзеровскӧй войскаэзӧн да сэсся Антантаӧн. Сы кадӧ, 1918 арпомсянь, юраліс Балаклаваын подпольнӧй уджӧн.
1919 воӧ Крым мездӧм уджаліс Крымскӧй ССР рабоче-крестьянскӧй правительствоын, кӧдӧн юраліс Д. И. Ульянов. Вӧлі просвещеннё сьӧрті народнӧй комиссарӧн (1919 во тулысшӧр-одзгожум). Одзланься Сталинскӧй премияа лауреаткӧт, гижись Констанин Тренёвкӧт, кӧда сы кадӧ юраліс комиссариатісь школьнӧй отделӧн, нія организуйтісӧ школаэз, бӧрйисӧ велӧтіссезӧс. Баитісӧ Симферопольын университет осьтӧм йылісь[4].
Удж подпольеын да вийӧм
1919 во гожумӧн, кӧр Крымӧ пырис Деникинлӧн Добровольческӧй армия, юраліс Феодосияын подпольнӧй уджӧн, лӧсьӧтіс вооружённӧй мятеж. Официальнӧя уджаліс делопроизводительӧн Металлисттэз союз правленнёын Алексей Алексеевич Андреев ним увтын. Сы участвуйтӧмӧн лӧсьӧтісӧ партийнӧй группаэз да боевӧй отряддэз Сарыголь станцияын, Феодосийскӧй портын да Ляцкий мельницаын. Подпольщиккез нуӧтісӧ разведывательнӧй удж, керисӧ враг тылын ыджыт диверсияэз.
И. А. Назукин уна кад сетліс агитациялӧ Деникинскӧй армияись солдаттэз коласын. Гарнизонлӧн мукӧд часттезісь солдаттэз долженӧсь вӧлі орсны ыджыт роль белогвардееццезлӧ паныт вооружённӧй восстаннёын. Лӧсьӧтчисӧ босьтны ас кипод увтӧ Феодосияись гарнизон да пантавны Гӧрд Армия часттэз Арабатскӧй стрелка районын. Пырны Крымӧ Перекоп да Сиваш пыр «гӧрддэзлӧн» эз пет генерал Я. А. Слащёвӧн дорйӧм кузя. Подпольнӧй организацияӧ пырӧм деникинскӧй агентсянь получитӧм юӧр сьӧрті ВСЮР-лӧн контрразведка арестуйтіс Назукинсӧ, да 1920 во тӧвпом 24 лунся асъяпонӧ (шойгу вылын даннӧйез сьӧрті — одзтулыс 6 лунӧ) сія вӧлі лыйӧм мӧдік 28 подпольщиккӧт ӧтлаын[2].
Дзебӧм ӧтласа шойнаын Феодосияын[5].
Культураын
- Иван Назукин босьтӧм Константин Тренёв «Любовь Яровая» (1926) нима пьесаись комиссар Кошкин прообразӧ[4]. Ӧтнима 1953 фильм-спектакльын рольсӧ орсіс Виталий Полицеймако, 1970 вося фильмын — Василий Шукшин.
- Лыддиссьӧ, мый Максимилан Волошинлӧн «Матрос» нима кывбур сиӧм Назукинлӧ[6].
Касьтылӧм
- Назукин нимӧн шусьӧ Балаклаваын медшӧр вадортуй[7].
- Феодосияын Назукин нимӧн шусьӧ улица да Горький нима улица вылын 1980 воӧ вӧлі сувтӧтӧм Назукинлӧ памятник (скульпторрез В. В. Петренко, В. З. Замеховский). Одзжык сы местын сулаліс Александр III памятник[4].
- Феодосияын ӧтласа шойна местын сувтӧтӧм монумент.
- Пожваын, шӧрӧт № 1 школа одзын, сувтӧтӧм И. Назукинлӧ бюст (скульптор А. С. Старков).
- Сы нимӧн — «Иван Назукин» — шусис феодосийскӧй портісь «Радуга» 485М3 (2-ӧт серия) типа теплоход[8].
Пасйӧттэз
- ↑ 1 2 Семин Г. И. Герой гражданской войны Иван Назукин. — серия Замечательные люди Прикамья. — Пермь: Пермское кн. изд-во, 1962. — 61 с.
- ↑ 1 2 НАЗУКИН ИВАН АНДРЕЕВИЧ (2015-06-20).
- ↑ Тарас А. Е. Подводные лодки Великой войны 1914—1918. — Харвест, 2003. — 336 с. — ISBN 985-13-0976-1..
- ↑ 1 2 3 В. Пашин Памятник И. А. Назукину (2002-2018).
- ↑ Герою гражданской войны Ивану Назукину Архивировано 16 Гожумшӧр 2015 года.
- ↑ Зарубин, А. Г., Зарубин, В. Г. Без победителей. Из истории Гражданской войны в Крыму. — 1-е. — Симферополь: Антиква, 2008. — С. 301. — 728 с. — 800 экз. — ISBN 978-966-2930-47-4.
- ↑ Набережная Назукина (2018).
- ↑ Тип Радуга Морские пассажирские суда прибрежного плавания (2022).
Лыддьӧтан
- Семин Г. И. Герой гражданской войны Иван Назукин. — серия Замечательные люди Прикамья. — Пермь: Пермское кн. изд-во, 1962. — 61 с.
- А. М. Чикин. Севастополь. Историко-литературный справочник. «Вебер». Севастополь. 2008. ISBN 978-966-335-102-5. с. 359.
- Гражданская война и иностранная интервенция в СССР: Энциклопедия. — М.: Советская энциклопедия, 1987. — стр. 372.
- Тарас А. Е. Подводные лодки Великой войны 1914—1918. — Мн.: Харвест, 2003. — 336 с. — ISBN 985-13-0976-1.