Будрин Герман Николаевич
| Будрин Герман Николаевич | |
|---|---|
 | |
| Чужан лун: | 1900 во |
| Чужанін: | Кува, Соликамскӧй уезд, Пермскӧй губерния, Российскӧй империя |
| Кулан лун: | 1980 во тӧвпом 4 лун |
| Куланін: | Кудымкар, Коми-Пермяцкӧй автономнӧй округ, РСФСР, СССР |
| Канму | |
| Удж | велӧтісь, музыкант |
Будрин Герман Николаевич (1900 во, Кува, Соликамскӧй уезд, Пермскӧй губерния, Российскӧй империя — 1980 во тӧвпом 4 лун, Кудымкар, Коми-Пермяцкӧй автономнӧй округ, РСФСР, СССР) — велӧтісь, Кудымкарын челядь понда шылад школа аркмӧтісь.
Олантуй
Чужис 1900 во тӧвпомӧ Куваын служащӧйез семьяын[1]. 1918 воӧ помаліс реальнӧй гимназия.
1918—1919 воэзӧ уджаліс Яраш школаын велӧтісьӧн, 1919—1922 воэзӧ — Разин школаын.
1922 воӧ вӧлі бӧрйӧм Верх-Иньва волостнӧй исполком председатель вежлісьӧн, уджаліс во сьӧрна.
Сэсся бертіс велӧтісь уджӧ: 1923—1924 воэзӧ уджаліс Яраш школаын, 1924—1926 воэзӧ директораліс Шадрин школаӧн, 1926—1928 — Белоёв школаӧн, 1928—1930 — Кӧч школаӧн.
1930—1931 уджаліс Коми-Пермяцкӧй исполкомись велӧтан юкӧтын инспекторӧн.
1931—1942 воэзӧ уджаліс велӧтісьӧн Кудымкар педагогика училищеын. Сы коста, 1937—1939 воэзӧ, велӧтчис Перем педогогика институтісь география юкӧтын.
1943—1949 воэзӧ юраліс Пешнигорт детдомӧн.
1949—1951 воэзӧ директораліс Кудымкар шӧрӧт № 8 школаӧн.
1951 воӧ аркмӧтіс Кудымкарын челядь понда шылад школа да юраліс сійӧн куим во сьӧрна[2].
1957—1961 воэзӧ директораліс Пионеррез дворецӧн.
1963—1965 воэзӧ директораліс Кудымкар шӧрӧт № 5 школаӧн.
Куліс 1980 во тӧвпом 4 лунӧ[1].
Донтан пассэз
- Коми-Пермяцкӧй Окружкома ВКП(б) да Окрисполкомсянь Почётнӧй грамота (1945)[3]
- «1941-1945 воэзя Великӧй Отечественнӧй война коста ыджыт удж понда» медаль (1945)[1]
Морт йылісь
Герман Будриныс вӧлӧм ӧддьӧн бур сьылісьӧн да орсӧм быдберся шылад инструментӧн. 1929 воӧ Сыктывкарын «Ордым» журналын петіс Нёбдінса Витторлӧн «Коммуын» нима висьт. Сыын сія этадз касьтылӧ Будринсӧ:
… локтіс Густоев — вӧчӧма ставсӧ: афишаяс ӧшлӧмаӧсь пионеръяс быдлаӧ. Волісны миянӧс видлыны уна представительяс. Ёна отсаліс миянлы велӧдысь Герман Николаевич Будрин. Сійӧ бура кужӧ гудӧкӧн ворсны да, ми велӧдім кымынкӧ коми сьыланкыв: Будрин аккомпанируйтӧ, ме да Питю Ӧньӧ сьылам.[4]
Кудымкар педагогика училещеись 1930-ӧт воэзӧ велӧтчись К. Ковыляева 1999 воӧ висьтасис этадз:
… Эна аресттэз (1937 вося) вотöдз гожумнас, ми студенттэс, пондiм лöсьöтчыны Москваö экскурсияöн. Руководительнас вöлi Герман Николаевич Будрин. 100 рубöн стипендияись öктiсö, но колiс эшö. Быдöнныслö кинкö сетiс деньгасö, а меным сэсся некытiсь вöлi. Мöдi бöр ни босьтны, да Будриныс эз сет. Ме локтi корны 100 рублейсö, да сiя меным öддьöн по-свойски висьталiс: «Кыдз шеяат тапка, да бöрпонат дринга… Кöр мöдан сэсся Москвасö адззывны? Училищесö кончайтан да жöник сайö берездасян, да сэсся тыр тюньки-петюнькиэтö öктан (этö сiя учöт кагаэз йылiсь), сымда и адззылан». Эз сет деньгасö бöр. Да и подружкаö сэтöн и эм, эд сетö пö сылö, Герман Николаевич, ась пö ветлö Москваас. Сыбöрын дядьö мымдакö сетiс да Андрей Никифоровичыс 10 руб. содтiс… Андрей Никифорович пыр рочöн баитiс, а Будриныс, кöть роч семьяись, а миянкöт, комиэскöт, комиöн баитiс, велалiс коминас…[5]
Пасйӧттэз
- ↑ 1 2 3 Будрин Герман Николаевич // Гордость Пармы : [биографический справочник]. — Кудымкар : Коми- Пермяцкое книжное издательство, 2008. — C. 28. — 568 с. ISBN 978-5-87901-121-0
- ↑ История школы МБУ ДО «Кудымкарская детская школа искусств имени А. И. Клещина» (видзӧтан кад 14.04.2025)
- ↑ Будрин Герман Николаевич // База данных «Трудовые рекорды и передовые работники на предприятиях Молотовской области в годы Великой Отечественной войны» ГКБУ «Пермский государственный архив социально-политической истории» (видзӧтан кад 14.04.2025)
- ↑ Нёбдінса Виттор. Коммуын. Коми-пермяк округӧд ветлӧм-мунӧм Культурная карта Республики Коми (видзӧтан кад 14.04.2025)
- ↑ Любовь Косова. Сэтшӧммесӧ вунӧтны некыдз оз позь. «Парма», № 223 от 20 ноября 1999 г.
Ыстӧттэз
- Будрин Германлӧн сьылӧм (аудио) // Записи фольклорной экспедиции в Коми-Пермяцкий округ. Июль 1968 г. [Звукозапись] / собиратель, сост. П. И. Чисталёв. Национальная электронная библиотека Республики Коми (видзӧтан кад 14.04.2025)